香港競爭力倒退

新年流流，本來都想講番啲開心嘢，但係大家睇吓今日香港搞成咁，又真係開心唔起嚟。呢嗱，最近一項調查顯示，香港雖然喺全國城市裡面，競爭力仍然排名第一，但係成長競爭力排名就跌到去第十一位。
簡單啲講，即係香港老本充足仍然總排名第一，但係計發展後勁，香港就越嚟差，遲早淪為內地第三流城市，你話死唔死呀﹖
歡迎發表意見，1/2刊於《太陽報》「博客擂台」欄目內(截稿時間為1/1 5:00pm)

新年願望

話咁快2009就嚟完結啦，送舊迎新，大家2010年又有咩願望呢……
歡迎發表意見，1/1 刊於《太陽報》「博客擂台」欄目內(截稿時間為31/12 5:00pm)

巨鼠樂園

食肆竟然可以成為大老鼠開P既場地，莫講話食野，只係聽聞，已經令人想將隔夜飯都嘔番出嚟。會唔會係嗰間快餐店最新推出野味套餐呀……

六合彩變五合彩

有單新聞好搞笑，話說有人買咗張六合彩電腦飛，點知每注得哥五個字喎。嘩﹗好彩唔中啫，如果哥五個字都中咗的話，咁到時真係審死官有排拗囉……
歡迎發表意見，30/12 刊於《太陽報》「博客擂台」欄目內(截稿時間為29/12 5:00pm)

天降飛剪

青衣長亨邨繼發生巨型垃圾桶掟落樓後，又有狂徒趁「拆禮物日」將七吋長鉸剪掟落樓，一名清潔課程女導師慘被插中後腦，佢忍痛拔出鉸剪，雖然好彩只係受輕傷，但係鮮血狂噴染紅兩包紙巾，真係好多人驚﹗
歡迎發表意見，29/12 刊於《太陽報》「博客擂台」欄目內(截稿時間為28/12 5:00pm)

加價熱潮

歌仔都有得唱︰「糖又加，鹽又加」。事實上加風真係已經打到嚟，有飲食業界表示，沙糖、雞蛋等價格升咗唔少，擔心農曆年後唔少小型茶餐廳都會被逼結業。
歡迎發表意見，28/12 刊於《太陽報》「博客擂台」欄目內(截稿時間為27/12 5:00pm)

醉駕殺人停不了

成日話酒後駕駛，累己累人，但偏偏有啲人就當係耳邊風。呢嗱，聖誕節前夕一個中學教師就畀一個涉嫌醉駕既司機撞死啦，真係好冇陰功囉﹗
歡迎發表意見，27/12 刊於《太陽報》「博客擂台」欄目內(截稿時間為26/12 5:00pm)

迷幻的士

的士司機也索K﹗有的哥懷疑索完K，不勝藥力，竟然將架車就咁停喺高速公路中心，險象環生，據報道司機畀到場調查既警察叫醒時，神智迷糊，嘴角仲有白色粉末添。嘩，睇嚟校園自願驗毒計劃有必要擴展至運輸界喎……
歡迎發表意見，26/12 刊於《太陽報》「博客擂台」欄目內(截稿時間為25/12 5:00pm)

搵笨機頂盒

香港地做消費者有時都幾慘。幫襯電訊商，又要被蠱惑短訊騷擾，機頂盒又出現呃人既推銷手法，消委會開咗幾間公司既名，有啲冒充房署職員，有啲甚至呃公公婆婆話如果唔裝機頂盒就冇電視睇，真係冇陰功呀﹗
歡迎發表意見，25/12 刊於《太陽報》「博客擂台」欄目內(截稿時間為24/12 5:00pm)

我想做私隱專員

平機會主席鄧爾邦大花筒，但係就畀人鬧極都唔使走頭，當時大家都諗︰究竟仲有冇咁既筍工﹖答案其實係肯定既﹗大家睇吓私隱專員吳斌，又係犯下多宗罪，點知佢通通卸畀其他人，都係又冇人吹得佢脹就知啦﹗
歡迎發表意見，24/12 刊於《太陽報》「博客擂台」欄目內(截稿時間為23/12 5:00pm)

援交地下化

援交蔚然成風，聽講最近有援交少女為逃避警方放蛇，唔再喺網上兜客，而改由熟客仔做馬伕，然後分番佣畀佢。嘩，咁搞法，想幫佢哋都幾難喎……
歡迎發表意見，23/12 刊於《太陽報》「博客擂台」欄目內(截稿時間為22/12 5:00pm)

趕絕雪糕仔

政府今年再發電單車賣雪糕既牌照，結果好多人爭，但係爭到都未必係一件好事。有位仁兄有牌經營架，點知畀食環署販管隊啲人話佢「阻街」，最妙既係，明明警察都話唔阻街，販管隊班友就夾硬要用呢個罪名檢控嗰位仁兄。大家話嘞，咁樣都唔叫做趕絕呀﹖
歡迎發表意見，22/12 刊於《太陽報》「博客擂台」欄目內(截稿時間為21/12 5:00pm)

煲呔曾面皮超厚

煲呔曾民望低殘係人都知，但係佢勝在有阿Q精神。日前佢出席一個電視專訪節目時，被問到點解自己咁低既民意支持，佢居然話︰「我做咗四年特首，依家仲有咁嘅支持率，已經好好同好幸運喇！」嘩，面皮會唔會厚咗啲呢﹖
歡迎發表意見，21/12 刊於《太陽報》「博客擂台」欄目內(截稿時間為20/12 5:00pm)

手術分貴賤

乜嘢叫做親疏有別﹖除咗睇煲呔曾之外，都可以睇吓公立醫院點做嘢。有個病人心臟病發入院，醫生明明都話係嚴重，但係唔知點解住院一星期就被人叫出院，連通波仔手術都冇做。卒之呢個病人出院後心臟病復發，仲不幸過埋身添。老實講，如果病發嗰位係高官，你打死我都唔信醫院會咁懶懶閒﹗咁樣都仲唔係親疏有別係咩呀﹖
歡迎發表意見，19/12 刊於《太陽報》「博客擂台」欄目內(截稿時間為18/12 5:00pm)

短訊陷阱多

蠱惑收費短訊肆虐多時但政府懶理，直至被輿論狂轟，電訊管理局終於出手做嘢，急召各大電訊商開會，並即時達成四項共識以改善濫收短訊費用問題。各位網友認為濫收短訊費用既情況有冇機會改善呢﹖
歡迎發表意見，19/12 刊於《太陽報》「博客擂台」欄目內(截稿時間為18/12 5:00pm)

假藥優勢產業

周一嶽早排出嚟宣布，話政府撥四塊地出嚟搞私家醫院，話可以改善醫療服務質責喎…計我話，市民唔食錯藥已經執番身彩啦，仲話高質素服務。呢嗱，有病人組織做過調查，發現兩成病人曾經買過假藥，醫療產業化喎……
歡迎發表意見，18/12 刊於《太陽報》「博客擂台」欄目內(截稿時間為17/12 5:00pm)

網上賣初夜

家陣啲後生仔真係好既唔學，居然學人哋外國人喺網上賣初夜，聽講仲賣到成幾萬銀一個初夜。講真，有咩唔好賣吖，竟然走去賣初夜，試問呢門生意點能夠可持續發展呢﹖
歡迎發表意見，17/12 刊於《太陽報》「博客擂台」欄目內(截稿時間為16/12 5:00pm)

少女索K洗腎

唔少青少年鍾意索K就大家都知，但原來情況已經超乎想像咁嚴重。有家庭醫生話見過有女童九童開始索，索到十三歲終於要洗腎，好得人驚啫。大家有冇好計幫吓呢班後生仔女呀﹖
歡迎發表意見，16/12 刊於《太陽報》「博客擂台」欄目內(截稿時間為15/12 5:00pm)

惡司機劏客

不肖的士司機涉嫌濫收車資，兼且鎖門禁錮外籍遊客。講真，淨係讀呢單新聞都已經夠激氣。如果事件屬實，咁香港乜嘢架都被呢班人丟清光啦﹗
歡迎發表意見，15/12 刊於《太陽報》「博客擂台」欄目內(截稿時間為14/12 5:00pm)

運動員唔係垃圾

香港足球隊踢贏日本，令全港足球員即刻可以挺直腰板，講一句「香港運動員唔係垃圾」。但問題係，贏咗就唔係垃圾，咁其他輸咗既隊伍點算﹖係咪要向中國隊高歌一曲《國足歡迎你》呢又﹖
歡迎發表意見，14/12 刊於《太陽報》「博客擂台」欄目內(截稿時間為13/12 5:00pm)

噓爆煲呔曾

煲呔曾真係唔受歡迎。佢尋晚去香港大球場觀看睇東亞運賽事，點知一入場看台上竟然噓聲四起，呢一種待遇，恐怕只有佢既前任老董先至有資格享受咯﹗
歡迎發表意見，13/12 刊於《太陽報》「博客擂台」欄目內(截稿時間為12/12 5:00pm)

疫苗風險無人知

豬流感疫苗已經運抵本港，孕婦長者等高危人士可以優先接種，但弊在外國有啲個案接種咗之後產生嚴重副作用，究竟接種疫苗安唔安全，真係令小市民好擔心。咁都唔止，當局仲要求市民接種前簽一份「生死狀」，嘩﹗好嚇人啫下話﹖
歡迎發表意見，12/12 刊於《太陽報》「博客擂台」欄目內(截稿時間為11/12 5:00pm)

白車維修斷估

白車耐唔時就死火跪低，有時病人送到醫院都已經救唔番。負責維修保養既機電工程署被死因庭批評只有「業餘水準」、「斷估」，又話消防處應該「換車房」。大家又認為咁樣做能唔能夠治本呢﹖
歡迎發表意見，11/12 刊於《太陽報》「博客擂台」欄目內(截稿時間為10/12 5:00pm)

秘密截聽冇王管

執法部門大支嘢
啲執法部門真係離晒大譜，警隊成日喺FOXY洩密，其他執法部門亦唔見得好好，激到截取通訊及監察事務專員胡國興紮紮跳，話有啲直頭當佢冇到，有啲就畀流料佢。
講真，小市民私隱冇乜保障已唔係新聞。你睇吓我哋有點樣嘅警隊同私隱專員公署，就知咩一回事啦。不過今次事件裏面胡官真係一語中的，佢話有執法部門存在反叛心理，甚至有人覺得胡官「你管我做咩？喺度搞搞震！要應酬你！」
的而且確，無論係執法部門侵犯市民私隱又好，公立醫院打錯針輸錯血都好，總之就係一句話：我哋做緊嘢，你哋做乜喺度搞搞震阿芝阿佐？

路牌亂哂龍

忽然執正成效唔樂觀
全港數以萬計樓宇冇門牌，有門牌號碼又大小不一、胡亂置放，令人搵路時i晒頭，更可能影響緊急救援服務。家陣差餉物業估價署話會執番正喎，最高可以罰款二千蚊同監禁六個月，你哋又信唔信做得到呢？
好多法律界人士就唔係好樂觀嘞，佢哋話喎，要規管就應該喺立例後嚴格執行，而唔係「懶理」後不時擾民。咦，咁講法，即係可以隨便幫自己住嗰幢大廈搵個好意頭啲嘅門牌喎！而明明隔籬單位係三號，我係四號咪好蝕底？梗係安番個「三三八八」號牌，寓意生生發發啦；至於邊個同你有仇，你就幫佢安個「十三號」邪釘門牌，包保佢仲激氣過畀你搵個八卦鏡照住呀！

為藍天加電費

市民立喺必敗之地
聽講兩電以增加更環保嘅天然氣發電令成本大幅上漲為由，正申請緊加價，好可能下年元旦就實行。咁即係話，一係就捱污濁空氣，一係就捱貴電費，總之市民就立喺必敗之地啦！
好嘞，我當你成本上漲要加電費勉強講得通，咁之前煲呔曾提出嗰個慳電膽現金券計劃，理論上落實後市民用電少咗，應該更環保至啱o架，咁點解電力公司又話要加電費呢？如果咁講，咪即係市民環保都要受罰？人哋澳門都向用水量減少一成嘅住宅用戶回贈水費啦，點解香港電力公司唔學吓人哋，鼓勵香港人慳電呢？
成本上漲要加，收益少咗又要加，真係想問佢，到底咩情況先有得減呢？

交警片車

轉揸白車救急扶危
三名當值交通警懷疑約埋一齊鍊車，其中一架仲炒埋，鐵騎巡警受重傷。吓？乜咁都得？睇嚟呢三個掛住鍊車嘅交警，應該轉去揸白車，咁咪可以早啲到達現場囉；又或者索性轉行做賽車手，代表本港出戰澳門。
揸鐵馬嘅交通警鍾意鍊車，點知第時有冇其他警員鍾意射擊，得閒無事比併槍法準唔準㗎？依家諗番轉頭，其實拍拖必警員已算好好㗎喇，起碼唔會累街坊吖！
呢個時候，「FOXY天王」應該再度出場為民請命，佢一次過可以摷到百幾份警方機密文件，唔知可唔可以搵到交通警下一次舉辦「賽車」嘅路線同時間等詳情呢？等小市民可以避開嘛！

醉駕殺人又輕判

公唔公道睇你點睇
落馬洲車禍肇事司機醉酒駕車導致六人死亡，法庭判佢六項誤殺罪全部成立，有死者家屬怒斥咁樣即係「殺一個人判一年，好唔公道」，各位又點睇？咁樣判法對其他醉貓司機有無阻嚇作用？
公唔公道，睇吓你點計嘅啫。好似舊年就有一個經典案例，有個男人虐殺懷孕赤麂，結果都係被判入獄半年。可能大家會話，人點同動物比呀？都係嗰句，睇吓你點睇啦，赤麂有兩隻眼，人有兩隻眼，豬亦都有兩隻眼，咁即係話人即係等同赤麂，赤麂亦都等同豬啦！仲有唔好唔記得，赤麂係受保護動物，一屍兩命，即係一條命三個月。人唔係受保護動物，窮人更加要幾多有幾多，一條命一年好重o架啦！

警方機密網上任睇

FOXY代言人—特警成
警方機密文件又透過FOXY透露。都唔明點解啲差大哥咁唔小心嘅，之前都試過幾劑玩FOXY玩出禍㗎啦，點解仲唔咁醒水㗎？睇嚟特警成都要食定多啲喉糖，費事道歉道到聲都沙。
今次事件凸顯警方嘅無能而治，但係對於FOXY嚟講就係一個難得嘅宣傳機會嘞。大家諗吓啦，警察話晒都係一個講究保密嘅機構，竟可透過佢哋搵到警方機密文件，咁不如索性搵特警成做代言人啦。建議個廣告可以倣效某名牌生髮中心咁樣，鏡頭影住特警成接電話：「喂，警務處。」市民：「警局呀，我想報失呀。」特警成：「你打錯啦，要搵嘢安裝FOXY咪得囉，使乜勞師動眾呀？」

超豪校園

「德政」值得大力鼓吹
東亞運就嚟開幕，到依家都甩甩漏漏，連電腦都唔夠用，可能係使得太少錢啩！睇吓人哋職訓局喺調景嶺起嘅兩幢新校舍啦，使咗成十二億㗎，夠搞三次東亞運有突。唔好咁獨食好喎，一於開放畀遊客參觀啦！
十二億起間學校，大家都話唔抵，之但係相比起其他公營機構洗腳唔抹腳嚟講，都勉強可以講有一個「好處」，就係普通人家嘅子弟都有機會入讀，而鄧爾邦坐商務客位環遊世界「公幹」、入住大使級酒店套房，我哋唔會有份享受喎！
所以呢，起超豪校園呢項「德政」絕對值得大力鼓吹，最好十八區都起「超豪泳池」、「超豪體育館」，等小市民都沾吓光歎番吓嘛！

港產聖誕老人

喺香港撈盞出醜
香港好似好耐都冇咩開心新聞，今年聖誕老人奧林匹克比賽，由一位香港人勝出，都算係香港嘅驕傲咯。呀，唔知大家自己人，向呢位聖誕老人要禮物，佢會唔會畀大份啲我哋呢可？
其實阿Jim都係喺外國做聖誕老人好喇，香港啲細路仔都冇晒童真啦，見到你盞問你現兜兜攞錢使，或者送啲K畀佢哋索，又或者掹吓你啲鬚，等你出吓醜。再講啦，聖誕老人始終係外國嘢，唔啱我哋中國人社會，提到送禮物嘅使者，中國人梗係第一時間諗起財神，又或者有求必應嘅黃大仙啦，到時聖誕老人要淪落到幫人度條必勝波馬貼士，搞到滿身銅臭味，咁就大煞風景啦！

遊港十件事

老外賣口乖另有目的
美國《時代周刊》網站向旅客介紹遊港十件必做嘅事，睇落好似冇乜驚喜，反而各位網友同小白兄嘅「另類遊港指南」就極有創意，睇嚟豪伯都無謂喺度狗尾續貂啦，一來無謂獻醜，二來就算諗得再好又點吖，旅發局又唔會畀番錢你嘅。
諗諗吓，老外無啦啦賣口乖，到底有咩目的？近排《時代周刊》以「美國要向中國學習嘅五件事」為封面古仔，落足鞋油，連中國教育制度都讚一大餐，話中國學生平均叻過美國學生好多，無非都係「捧殺」，等你哋中國人鬆毛鬆翼，出手拯救世界兼繼續買多啲美國國債。所以計我話，香港應該立即大事宣傳「死前必到嘅十大新加坡景點」就差唔多！

污染指數也造假

樓層篤數為住客着想
咪以為淨係內地先至造假叻，依家就嚟一國一制㗎喇！有大學用自己製作嘅儀器測量本港空氣污染指數，得出嘅結果比環保署公布嘅高兩至三倍。鬼咩，原來環保署放喺路邊嘅儀器成五米高，乜嘢污染物都淡晒啦！
嘩，真係愈諗愈心驚喎，啱啱同小白兄先鬧完十九環保招實行後，市民壽命先至增加一個月咁大把，依家諗諗吓，都唔知係咪篤數嘅啫！
不過呢單空氣污染指數造假疑雲，都為大家提供一個好重要嘅訊息，就係原來身處愈高嘅位置，空氣質素係愈好㗎，唔怪得四十層樓高嘅大廈，頂樓居然係八十八樓啦！原來都係想住客覺得空氣好啲，咁自然都健康啲！

人肉迷你倉

割錯器官為增空間
打開電視，成日見到迷你倉賣廣告，有個老外着住唐裝衫帶領成棚人高呼公司電話號碼。計我話，使乜嘥錢搵地方擺嘢吖，你自己個身體已經係現成「迷你倉」啦！唔信？睇吓今期醫管局《風險通報》，病人體內原來可以放導管、紗布、金屬圈等物品，真係幾好用o架！
將人體改裝成迷你倉，絕對有好多好處，起碼唔會好似幾年前某銀行咁樣，裝修嘅時候唔小心將保險箱當廢物咁掉咗去堆填區。
老實講，香港應把握機會，發展人體迷你倉業務。咁做唔單止可以廣開財源，第時唔小心割錯病人器官，都可以理直氣壯咁反駁，話增加迷你倉儲存空間，係配合人體迷你倉發展政策！

十九環保招有幾勁﹖

特區政府叻過上帝
環境局嘅空氣質素指標公眾諮詢就快結束，總共建議咗十九項改善空氣質素嘅招數，好似好大堆頭咁，但係畀醫學界批評標準定得太低。哦……唔怪得政府話就算做齊呢十九項，市民平均壽命都只能夠延長一個月咁大把啦！
諗深一層，一個月時間真係話長唔長話短唔短，上帝創造世界都係用咗六日之嘛，照咁計，特區政府咪叻過上帝五倍？不過其實大家都係唔使太認真，因為無論最終港人平均壽命有幾多，政府都可以大大聲咁話：「呢嗱，好彩我哋有推行十九環保招咋，如果唔係，你哋條命仲會短一個月㗎！呢條×-1個月方程式堪稱無敵，睇吓你哋刁民仲點駁嘴駁舌！

facebook自殺群組

留意有冇做世界群組
有青少年喺facebook發起自殺群組，有人更號召喺下個月二十一號「採取行動」。乜家陣啲後生仔咁唔珍惜生命㗎！不過咁，細嘅就話唔識諗啫，大嘅都唔好得幾多，警方竟然只係集中同元朗一個地區嘅校長開會。大佬呀，全港其餘十七區啲後生仔女唔會睇唔開㗎？
講番青少年自殺問題，其實都係要多得facebook呢項偉大發明。後生仔靜雞雞自己「柄」埋一邊自殺，發覺嘅時候已經太遲，依家佢哋事先張揚，咁都仲有得幫吓佢哋。話時話，唔知銀行劫匪又會唔會透過facebook成立「我要練習做世界」群組呢？咁警方辦案都容易啲，斷估唔使太醒目都可以應付得嚟。

煲呔曾管治肥佬

落力保障淫賤言論
有調查發現煲呔曾喺十九個管治項目裏面，市面評分竟有十六項唔合格，睇嚟佢嘅民望真係低處未算低。
正如網友阿九話齋，其實煲呔曾管治肥佬，都唔算係咩新聞，奇就奇在煲呔曾仲有三瓣係合格喎！查咗一大輪，終於畀豪伯發現，原來係「選舉自由公平」、「政府廉潔」同埋「保障言論自由」呢三瓣。
提起「保障言論自由」，香港真係認第二未必有人敢認第一。大家睇吓，有啲傳媒長期宣淫販賤，最多都係被罰雞碎咁多；佢哋喺台灣照辦煮碗，台北市長立即暴喝一聲，重罰佢哋五十萬新台幣。你哋話嘞，香港保障淫賤言論自由表達，唔係全球第一咩？

九霄驚魂

民航處又搵前線祭旗
民航處耗資逾千萬公帑買咗套抵港航班管理系統，點知上個月試用階段已爆出錯誤航班訊息危機，好彩空管人員發現得早立即改以人手操作，先至避過一場九霄驚魂咋。喂，人命關天㗎，點可以好似細路哥玩泥沙咁試吓試吓㗎？
早排醫管局派員去外國考察豐田車廠運作，畀人插到暈。唔知民航處係咪因為冇去外國考察至出事呢？應花嘅公帑又唔花，唔應使就使咗去，吹脹。講開又講，睇落民航處嘅辦事作風又同醫管局有幾分相似。聽講民航處管理層為咗推卸責任，對幾位空管人員施以停牌處分。又玩「刑不上大夫」，求其搵幾件前線出嚟祭旗，仲話唔係向醫管局偷師？

明愛明害人

蘇利民白幾百萬年薪
明愛醫院眼科又試嚟料！有個二十四歲女仔遊完泰國返香港，發現染上結膜炎，醫生將佢轉介去明愛醫院，點知院方居然話佢唔係嗰區居民，要去第二間醫院再排過。最好笑係，病人之後打嚟本報求助，記者去到之後，院方人員即刻變臉，仲有醫院領導人陪住睇醫生添！
醫管局總裁蘇利民幾百萬年薪，竟然叫唔郁明愛醫院啲員工接收病人？本報記者一出動，就立刻令到班人貼貼服服，不如由記者埋蘇利民份人工好唔好？
不過都係唔得，事關記者入主醫管局後，一定將依家個肥上瘦下嘅架構推倒重來，到時肯定宣布全體管理層減薪一半，到時班大帝同你死過都似！

公營機構一擔擔

吳斌面皮厚算死草
唔好以為得平機會主席鄧爾邦大花筒，聽講就快公布嘅審計報告會狂數私隱專員吳斌都係一擔擔，用公帑為前任專員鄧爾邦搞盛大歡送派對。政府攞咁多公帑養呢拃資助機構，同將錢掟落鹹水海有咩分別呀？
諗深一層，雖然鄧、吳兩個都係大花筒，但係吳斌面皮可能仲厚啲！唔係啩！鄧爾邦畀立法會帳委會「極度遺憾」都不為所動，仲有人面皮厚得過佢？大家記唔記得舊年私隱專員公署年報顯示外訪支出多咗，竟然仲繼續伸大手板問政府攞經費，連幫政府部門搞講座都話想收錢，問你怕未？吖，唔知係咪公署當年幫鄧爾邦搞派對時，畀人投訴冇提供埋「大使級套房」呢？

學童環保意識差

太老實大個點做官
聯合國兒童基金會香港委員會調查發現，本港學童環保意識有待提高。
香港學生環唔環保我就唔知，但肯定太過老實喇！如果豪伯我係受訪學生哥，我一定會話：「有冇搞錯，淋花灑咁浪費？我都係用洗地用剩嘅水沖涼咋！」
咁樣答法，衰就係衰啲，但係你諗吓啦，高官講親環保都係呃人嘅，好似話慳電膽咁啦，明明唔夠LED燈咁環保，又有水銀污染問題，但政府就死係要推個乜鬼現金券計劃；仲有之前徵收膠袋稅，又唔肯專款專用推廣環保，堅持將收益撥入庫房，到頭來咪又係用喺公務員加薪！
所以話啫，後生仔及早培養對環保嘅「正確態度」，大個至有機會做高官回饋社會㗎！

侵權之都

打擊侵權選擇性執法
最近海關又發現店舖非法載入軟件破壞PSP同Wii原有嘅保安裝置，等玩家可以喺改裝遊戲機使用盜版遊戲軟件。枉政府成日話要將香港發展成「創意之都」，點知翻版遊戲就長玩長有。
唔係講笑，豪伯有次喺旺角好×商場，見到有個電視台男藝人喺度選購翻版遊戲光碟，最好笑係，嗰個男藝人戴住大大副黑超，以為遮住半邊面人哋就唔認得佢，我當時真係有衝動想走埋去問吓佢有乜翻版推薦！
不過點都好，海關都叫做肯做吓嘢捉吓啲改game嘅舖頭吖，反觀我哋東方報業集團旗艦網站on.cc嘅網上新聞報道，夠成日畀人盜用侵權啦，投訴極又唔見當局咁積極做嘢！

停賣龕位玩死人

難得私人市場幫拖
香港唔單止好多人上唔到樓，連陰宅一樣供不應求。政府咁多年嚟都冇出手增加公共龕位，最近突然叫停一啲私人龕位，話佢哋業務違反地契規定喎……嘩！咁樣之前「安居」嘅先人容乜易變另類難民㗎？
今次政府真係捉蟲，大家不妨諗吓，公營骨灰龕起到慢吞吞，依家難得有私人市場幫你分擔，又冇先人上街抗議自己係「冇殼蝸牛」，咁梗係悶聲發大財，繼續縮骨闊佬懶理㗎啦！不過呢單嘢都唔係冇得掹，記得早前牛池灣有間無牌車仔麵檔，被揭發過去九年被檢控近百次，仍然屹立不倒，地政總署大可援引呢個先例，得閒罰吓人錢，又可充實庫房，又唔會畀先人家屬嘈，一石二鳥啦！

東亞運外勞

女民兵揸旗再救票房
提起外勞，大家可能頭都暈一暈。你諗吓呀，之前攞行街紙嘅人士都可以做嘢，已經引起好大關注，搞到政府都要急急修例，莫講話直頭輸入外勞咯。
不過唔使驚，原來只係東亞運開幕禮，請咗兩個內地女民兵嚟做開幕禮嘅旗手。有啲人會大驚小怪，話東亞運明明係香港人嘅「傳奇一刻」，點解又由內地人擔任旗手呢？
咁講就唔啱數啦。成個東亞運明明水靜河飛，吉祥物又嚇到啲細路嗌阿媽救命，都係多得有劉翔、郭晶晶、林丹等內地體壇明星過嚟撐場，你個票房至唔會太難睇咋，家陣再幫你，搵兩個女民兵嚟幫你哋揸旗，唔該你哋飲水思源啦！

今日飲咗未﹖

賣水喉水都有商機
消委會最近調查發現，原來市面上好多標榜「無糖」、「少糖」嘅飲品甜到漏，其中一種細細支嘅飲品，一支已經等於三粒方糖，問你怕未？
依家食乜嘢、飲乜嘢都有人話唔健康，咁不如以後大家索性飲白開水算罷啦。你咪以為豪伯喺度講笑呀，紐約就真係有一個o靚仔，今年初忽然諗起，點解唔將水喉水包裝得靚仔啲出售呢？好多人聽到都話佢異想天開，但你咪理，呢種樽裝水喉水推出之後，竟然大受歡迎，據講原來好多人出到街都突然想飲番啖「清新」嘅紐約水喉水喎。
其實政府大吹六大產業都係假，索性自己種菜然後攞去賣，肯定仲有商機啦！

少男少女爭做Game模

搵到錢就係好模
有電子遊戲公司日前打正旗號招募Game模推銷產品，就吸引超過二百個少男少女爭嘞。唔知大家有冇覺得有啲奇怪呢？之前就話興o靚模，明明係以年齡嚟做劃界，跟住又出現所謂「模art」即係做artist嘅o靚模，即係用工作性質嚟劃分，再到依家嘅Game模，又改為用佢哋推銷嘅產品嚟劃分，咁遲啲如果有模特兒專門替音響產品拍廣告，咁唔知又應該叫乜模呢可？
不過唔理o靚模定係老模，搵得到錢就係好模。咁就啱嘞，其實後生仔女抱住搵食心態去做o靚模就啱嘞。打份工有咩求呀，咪又係求餐溫飽，又點會咁蠢畀人氹到交埋晒啲咩「培訓費」、「報名費」呀？

屎彈橫飛

驗DNA真兇冇得匿
繼之前掟大鐵錘之後，日前竟然有人離譜到掟屎彈落街，睇怕就嚟要搞有獎遊戲競猜下次跌乜嘢落街咯。
有犯罪學家話，屎彈狂徒可能受近日連串高空擲物事件影響，加入湊熱鬧，心態如同參加嘉年華。如果真係咁就好咯，當局不妨宣布對所有高空擲物狂徒既往不咎，但條件就係將佢哋困晒入一幢荒廢嘅大廈，畀佢哋入去開「高空擲物嘉年華」，到時佢哋鍾意掟雪櫃又好、掟人都好，都可以盡情去做，至於後果，當然係貴客自理啦！
吖，講開又講，成日話高空擲物案難破，照計今次掟屎彈嘅疑犯，除非佢哋喺公廁收集「彈藥」，否則唔係應該可以驗到DNA嘅咩？

報販賣煙隨時被拉

學賣四仔街邊派卡片
唔知各位有冇睇過最近上畫、改編自日本漫畫嘅《賭博默示錄》呢？豪伯唔係手痕想打幾圈，而係想請教吓睇咗嘅朋友，到底乜嘢叫做「默示」？原來法例規定以明示或默示方式，又或者所用嘅詞句能夠誘使、建議或促使他人購買或吸用煙草產品，都屬違法行為。
各位如果i晒頭嘅話，毋須氣餒，因為唔單止你同我唔明，聽講連控煙辦嘅前線人員都唔明，佢哋話見到報販將香煙陳列出嚟算唔算違法，要影低佢畀上級決定。
不如咁啦，以後報販賣煙仔不妨效法賣四仔咁，喺街邊搵人派卡片，向途人宣傳「埋邊有好嘢」，然後再帶佢哋去報攤買，唔知咁算唔算「默示」呢又？

學生扮狗

寵物非發洩壓力工具
有個非常女教師，為咗罰遲返課室上堂嘅學生，竟然罰班學生扮狗，侮辱人唔使本！
其實呢個非常女教師都算好好彩o架喇，遇到班咁乖咁聽話嘅學生。如果豪伯係其中一個被要求扮狗嘅學生，可能會做一隻失常嘅鬥牛p，又或者係一隻學極都唔識喺指定地方口殊口殊嘅puppy……嗰個女教師又係嘅，有咁多動物唔叫學生扮，係都叫人扮狗，扮吓兔仔呀、金魚呀唔得咩？再唔係叫學生扮植物，好似仙人掌咁都幾盞鬼吖！
不過個女教師最大問題唔係得罪學生，而係對動物唔好！唔係咩，喺佢心目中，寵物係用嚟發洩自己壓力嘅工具，呢一點先至最教壞細路呀！

拍拖必逍遙遊

結業禮求婚仲攞膽
警隊又賴嘢，今次輪到單車巡警拍拖必晒恩愛，有人仲要將纏綿私家相簿掟上Facebook添！哈哈，豪伯就曾經見過有人將自己早餐食嘅煎雙蛋放上Facebook，唔知仲以為有咩咁巴閉，唔通係太空人專用嘅食品？
咁都未算笑死人呀，原來除咗恩愛拍拖必外，網上仲流傳另一段警員「疑似結業禮求婚」短片。你知唔知警方點回應？佢哋話喎，有關警員藉結業禮邁向及慶祝人生另一重要里程，爭在未恭賀一對新人白頭到老，永結同心。
咦，問題重點幾時由係咪當緊值，變為係咪人生重要里程㗎？如果咁講，生BB夠係人生重要里程啦，咁拍拖必警員係咪可以……

點至算窮﹖

不如話香港係全民皆富
「點至叫窮」？因阿扁推介一炮而紅嗰本叫《窮得只剩下錢》嘅書，認為一個人就算好有錢但係心靈唔富足，一樣唔好得過嗰啲仙都唔仙吓嘅窮鬼幾多！
咦，咪住先！依家又唔係討論哲學問題喎，現實生活中，幾時見過住板間房捱電風扇嘅人畀人叫富翁呢？其實真正會問「點至叫窮」呢個一字咁淺問題嘅，得煲呔曾一個啫，佢老人家一時又話香港人「想窮都難」？最近又話貧窮嘅定義係嗰啲生活差過攞綜援嘅人士，或者因為貧窮標準太低，所以香港人想窮都難啩？煲呔曾呀，點解你唔索性話一日未餓死，一日都唔叫做貧窮呢？咁計法，香港肯定係世界第一個全民皆富嘅地區啦！

iPhone生蟲

英國蔡燶華未算最毒
專門針對破解版iPhone嘅蠕蟲依家傳得好勁，中毒嘅iPhone張wallpaper會自動變成英國過氣歌手Rick Astley個樣。
該煨囉，Rick Astley個地位約略同我哋香港「四大癲王」之一嘅蔡燶華同級，就算毒唔死部iPhone，都娘死個iPhone主人啦，陰功！
不過有一點好得意喎，條蠕蟲除咗將iPhone張wallpaper自動轉為Rick Astley個樣之外，又真係好似唔見對部機有咩特別傷害喎，可想而知一個人嘅樣可以有好大殺傷力。
哎吔，你話如果呢種病毒傳到嚟香港，仲出現變種，wallpaper個樣由Rick Astley轉為煲呔曾，咁你話係咪仲大鑊先？

奪命狂巴

將軍澳恐怖巴士翻側意外，釀成一死多人受傷既慘劇。話明係意外，有時固然無可避免，但係聽講話出事路段設計有問題，轉彎位時速限制竟然係時速七十公里，之後好快又降低為五十公里，咁講法呢單嘢係咪有少少「人禍」既味道呢﹖

歡迎發表意見，11/11 刊於《太陽報》「博客擂台」欄目內(截稿時間為10/11 5:00pm)

圍威畏開放日

不知悔改怒刮內鬼
水警醜聞浪接浪，繼開「海鮮美酒工作會議」後，又被踢爆將「開放日」變做「家屬同樂日」，明明可以藉機向市民介紹水警工作，點知咁都要益自己友，只有新舊同袍同佢哋嘅子弟至有幸登船參觀，有冇搞錯？
不過唔好話豪伯唔提醒有幸上船參觀嘅朋友，千祈唔好以為過癮呀，隨時出事㗎嘛！呢嗱，自從警官歎海鮮事件曝光後，有關人等第一個反應唔係檢討吓自己，而係諗：明明好低調㗎啦，點解都畀人踢爆呢？擺明係自己人告密啦！聽講家陣水警內部一片「白色恐怖」，個個都擔心自己被牽連。日後再有咩負面新聞，你哋上過水警輪參觀，分分鐘可能成為被懷疑對象！

東亞運冷清清

籃球水球共冶一爐
唔經唔覺，仲有唔夠一個月就到東亞運嘞。講真，家陣香港真係一啲氣氛都冇，紀念品銷情仲十分慘淡，有商舖接受記者訪問時，竟然話東亞運吉祥物太核突，嚇到啲細路仔喊咗出嚟，問你怕未？
話時話，呢兩隻貌似蘿蔔嘅物體仲衰過飛龍標誌，當年禽流感一役香港殺雞百萬名震國際，「飛甩雞毛」嘅代表性點都強過蘿蔔吖。
其實，香港唔係冇潛質辦一場令人「難忘」嘅東亞運㗎：田徑主場館跑道凹凸不平，到時短跑同障礙賽同步進行肯定別開生面；而作為籃球場館嘅西區公園體育館竟然漏水，更可以催生一種集籃球同水球於一身嘅全新運動。

水警海鮮精華遊

強姦報案人都可死撐查案
水警高級警官帶隊赴離島歎海鮮事件疑點重重，到底佢哋喺島上有冇部署打擊非法入境嘅行動呢？飲酒嘅人係咪全部都係休班警員……
不過話時話，記者明明全程直擊，都冇發現班阿sir喺島上有咩部署工作，點解警方仲可以死撐？唯一合理解釋係，當時成班阿sir，無論休班抑或當值，一心只係諗住點樣捉人蛇，就算佢哋未必有落site視察，都一樣可以達到「手中無劍，心中有劍」嘅最高境界。如果唔係嘅話，又唔見有警員強姦報案人，可以解釋為「查緊案」？我哋與其追究係唔係有人濫用公帑，倒不如同情吓呢班咁盡心盡力嘅警官，連食餐飯都唔盡興，隨時背脊骨落！

滬建迪園香港玩完

港迪士尼啱晒商務旅客
要嚟嘅始終要嚟，傳咗好耐嘅上海迪士尼終於正式落實，預計最快二○一四年落成，面積比香港嗰個大成倍幾！都係我哋啲高官夠淡定，商務及經濟發展局長劉吳惠蘭話喎，中國市場龐大，相信容納兩個迪士尼綽綽有餘喎，又話兩個樂園可以互補同合作喎。
咁又係嘅，上海迪士尼將會係全亞洲最大規模，香港迪士尼就係全世界最細，針對嘅並非普通顧客，而係一啲高質素嘅商務旅客，因為香港迪士尼設施少，加上唔使點排隊，可以好快玩晒，絕對適合日理萬機嘅成功人士！再唔係一不做二不休，建議迪士尼開到好似便利店咁，梗有一間喺左近，實行一拍兩散大家冇運行！

窮到燶 食快餐

超中產享受仲想點
政府數據顯示，酒樓等食肆去年生意額全線下跌，唯獨快餐店生意逆市上升。咁就梗係啦，打工仔隨時打爛飯碗，梗係慳得就慳！
唉，其實有得食快餐都已經係唔錯囉！大家唔好唔記得喎，依家好多中產人士慘到要去食物銀行申領救濟，快餐店對佢哋嚟講，已經係「山珍海錯」喇，只要大家光顧快餐店時抱住正確心態，一味諗住自己已經有「超中產享受」，咁就自然會開心好多！
可能讀者會問：食得多快餐店提供嘅垃圾食品，會唔會搞到周身病痛㗎？大家放心啦，呢樣嘢實走唔甩。都係嗰句，只要抱住正確心態，一味諗住肥胖呀、血脂過高呀等通通都係「富貴病」，就會歡迎佢哋㗎喇！

煲呔民望插水

創意工業催化者
煲呔曾民望低處未算低，港大民意研究計劃顯示佢只得四十八點四分嘅「不合格」新低。負責調查嘅學者講到明，煲呔曾攞呢個分已經可以被列作「不受歡迎」人物，如果低到得四十五分，就直頭有「信任危機」添！
咁香港人就慘啦，煲呔曾講到明民望於佢如浮雲，咁即係話如果佢賴死唔走，市民可能仲有兩年幾要捱！
不過，香港人都唔使太悲觀，依家港府力推創意工業成為六大優勢產業之一，計我話，煲呔曾都可以為唔少創意產品提供靈感。嗱！好似話政治諷刺漫畫咁吖，老董舊時坊間都出咗唔少㗎；其他包括《笑話大全》、出氣公仔等創意產品，趁呢個倒曾潮嘅時勢推出，肯定熱賣呀！

白車三級制

高官人工要按民望分級
白車三級制公眾諮詢期已屆滿，唔知各位讀者老爺有冇咁神心，將意見提交畀當局呢？老實講，豪伯其實都唔知應該將意見send去邊。不過其實仲使乜諮詢吖，連救護員工會代表都話，三級制根本模糊咗件事嘅焦點，如果政府肯填補三百名人手同重整救護資源，就可以保證服務承諾。
咁又係呀，有人濫用還有人濫用，唔可以因為有小部分衰人，而搞到真正危急嘅市民可能被延誤治療㗎！況且市民一聽到「分級」就怕啦，好似警察剝光豬，或者淫審制度都有分級，有邊樣效果係令人滿意o架？計我話，要分級都唔好攞小市民嚟搞，你班高官根據民意支持度將人工分級仲好過啦！

鏹戰世紀

煲呔曾應到黑點視察
旺角、深水埗接連出現鏹水彈狂徒，警方基本上可以話係束手無策。點知話口未完，西灣河又話整多單鏹水彈「恐襲」事件，問你怕未？
計我話警方係「非不能也，實不為也」。大家諗吓，如果煲呔曾話落區巡視，雖然會多咗好多人想從高空掟腐蝕性液體洩憤，但係我敢輸賭，一定唔會出現鏹水彈狂徒。只要煲呔曾耐唔耐去鏹水彈黑點視察，肯定天下太平嘞！
豪伯估計，呢個可能係政府因應近排樓價係咁狂飆而推出嘅措施。大吉利是講句，如果你住嗰區三日唔埋兩日就有人被鏹水彈掟親，邊個仲夠膽喺度買樓？到時莫講話七萬蚊呎，七百蚊都冇人要啦！

警察賠償討價還價

未計司機精神損失
買餸講價就聽得多，估唔到警方執法失當賠償畀市民都有價講。大家都記得早前「人肉路障」單嘢啦，有的士司機原本要求警方賠一更收入即六百蚊，點知警方都要「落地還錢」還價四百五。吓？咁都得？
喂，人哋喺高速公路揸揸吓車無啦啦畀你叫落車，嚇都嚇餐懵啦，呢方面嘅精神損失究竟有冇得賠都仲有排拗，家陣只係講緊幾百蚊啫，都要咁斤斤計較？
都唔明警方點得出四百五十蚊呢個數，或者佢哋認為事發時的士司機已經開咗一陣工，要計番比例啩。照咁計，旺角、深水埗接二連三發生鏹水彈案警方都束手無策，係咪都要考慮七五折支薪呢可？

社署亂批傷津

上唔到鹹網大件事
呢個社署認真混帳！申訴專員公署調查發現，社署喺審批傷殘津貼過程中甩甩漏漏，試過有個申領傷津人士，多年嚟失去左手所有手指申領傷津，但係醫生寫錯佢冇咗右手手指，社署竟然照批可也，其後又無端端唔批。
其實社署審批傷津個標準根本就好有問題，原來淨係鋸咗一條小腿，係可以唔獲批傷津嘅。咦？冇咗手指可以攞傷津，冇咗腳點解唔可以攞呢？唔通坐喺冷氣房嗰啲官以己度人，以為冇咗隻腳好小事，可以照常返工，但係冇咗手指，返工期間上鹹網會好唔方便，所以至咁批法？
唉！咁搞法，社會可以少好多傷殘人士，因為好多畀社署玩都玩死啦！

全城怒轟煲呔曾

早諗定下台藉口
煲呔曾今次都算大鑊喇！有團體將會喺聽日搞倒曾大遊行，喺報紙見到啲人連海報都出埋，呼籲大家當日齊齊喺禮賓府集合。坦白講，其實張海報都幾有創意㗎：一個煲呔喺上面，下面就係一個倒轉咗嘅「曾」字，遠望埋去似足一個苦口苦面戴眼鏡嘅人倒轉咗咁。
依家好多人都同意，話煲呔曾仲衰過老董，起碼老董只係衰無能，冇利益輸送吖嘛。但計我話，大家咁諗實在太睇小煲呔曾，起碼煲呔曾聰明好多，佢初初上台時已經講到明，自己飽受骨刺之苦，做好晒鋪排工夫，要起藉口上嚟，劇情都冇咁犯駁。

勞工處裝假狗

執到「筍工」喊三聲
以為明星至要裝胸作勢呃吓人啫，估唔到勞工處都興呢味嘢。試過有人寄出求職信後，先至知呢個位早已經請咗人，仲畀對方窒番轉頭，話佢哋已經將資料交咗畀勞工處好耐，點解依家至嚟申請喎！
不過計我話，就算勞工處介紹嘅係真工咁又點吖，好似早排勞工處網頁登咗份「筍工」咁，只要求中三學歷，略懂英語，每周五天工作，每日工作六個半鐘，唓，原來係卡拉OK女伴唱；勞工處網頁之前嘅另一「筍工速遞」，係一間補習社請打字員，一個月得二千蚊人工咁大把。
所以呢，勞工處都係唔使裝假狗裝得咁辛苦喇，索性轉做《警訊》，教打工仔唔好誤信網上求職廣告好過啦！

煲呔曾發難渣

醜聞亂子陸續來
煲呔曾返香港終於回應兩大醜聞，不過竟然唔係就事論事，而係發表一則所謂聲明，怒斥有傳媒「無中生有」、「惡意中傷」。煲呔曾出咗事就去旅行逃避，返到嚟就將責任賴喺人身上，佢不如出聲講到明，「以後唔侵你哋玩」啦笨！香港傳媒又確係犀利，竟然可以無中生有到幫「煲呔曾」作一個做燈膽代理生意嘅親家，同埋一個買過雷曼迷債嘅弟婦出嚟……正如立法會議員話齋，唐唐都承認煲呔曾開會時提過有「雷曼弟婦」啦，唔通唐唐又「無中生有」囉喎。或者煲呔曾覺得唔回應呢兩單醜聞問題不大，因為可能佢自己都估計，以後亂子將會陸續有來，單單都要回應，咁佢咪好唔得閒？

打手機多易有腦瘤

飛鴿傳書夠晒健康
嘩，乜打手機原來真係有機會增加患癌風險㗎？仲要係用超過十年就可能賴嘢？好得人驚喎！我哋上次都講過啦，調查話年輕人好鍾意頻頻換手機，咁樣講法，咪通街啲後生仔女個腦都有事？
嘩，如果證實長期用手機可能增加患癌風險，將來會唔會搞到好似外國嗰啲吸煙人士咁，集體控告煙草商，要求巨額賠償㗎？
照咁睇，可能真係要用番飛鴿傳書喇喎，事關夠健康，肚餓起上嚟又可以醫肚，強過手機多多聲啦。不過就算用手機唔患癌都未必可以安心住，各位男士有冇聽過，如果長期將手機放喺褲袋，可能導致不育呢？

燈膽權遊日本

搵老友麻生太郎敍舊？
煲呔曾居然喺呢個時候仲有閒情逸致去日本旅行，真係令人嘆為觀止。大佬呀，莫講話佢家陣醜聞纏身，欠市民一個交代啦，就算冇事冇幹，係咪都好應該留喺香港，了解吓市民大眾對佢份施政報告嘅反應呢？
煲呔曾冇公布喺日本嘅行程，但係豪伯估計佢可能同佢嘅好朋友、前首相麻生太郎敍敍舊。麻生前排叫冇錢嘅日本後生仔女「慳啲使」，冇錢就唔好學人結婚，否則唔會得到人尊重，煲呔曾唔知係咪從中獲得靈感，竟然叫買唔起樓嘅中產搬入偏遠細單位，兩位仁兄一樣咁涼薄，仲話唔係好朋友？呀，係嘞，唔知煲呔曾會唔會學埋麻生咁落台，以進一步加深彼此友誼呢？

雷曼弟婦

煲呔親坐定定等着數
作為煲呔曾嘅親戚，好處真係數都數唔晒：代理慳電膽嘅可以有生意做；投資時不幸損手，又可以率先有得賠；讀書要考試咩，都唔怕，煲呔曾識得個教授，同佢食餐飯大家聯誼吓，就自然過關啦。
最盞鬼嘅係，「煲呔親」永遠唔使開到聲尋求協助，煲呔曾自然會「不經意」咁向司局長提及，仲會根據廣大市民利益嚟作決定添！照咁講，「煲呔親」不但可以坐定定等收着數，仲可以惠及埋市民，真係一家便宜兩家着！
雖然真正嘅「煲呔親」名額有限，但係市民唔使失望，快快投考警察等紀律部隊，煲呔曾出身「警察世家」，又點會虧待你呢！

又加副局長！

全港市民抽獎做副局長
特區政府再委任兩個副局長，兩個都係嚟自公務員行列。咦，乜當初設立副局政助嘅時候，唔係話要吸納更多政治人才嘅咩？
不過，大家都無謂太過認真囉，煲呔曾夠話「以民為本」、「急市民所急」啦，結果大家都見到啦，話佢「急親人所急」都仲可能貼切啲。所以話，都係唔好對呢班副局政助有太大期望啦！同大家做個測試呀，你試吓一口氣講出五個副局長個名出來吖嗱，邊位讀者老爺咁把炮真係噏得出嘅話，豪伯即刻請佢食餐飯又點話？
反正大家都唔知班副局長係乜水、做啲乜㗎啦，不如當紓困措施咁做，全港市民都可以參加抽獎，幸運兒就係副局長一年合約。

星洲起影城港冇運行

「香港片場」猛片多籮籮
全東南亞第一個環球影城將於明年初喺新加坡開幕，日前更嚟香港宣傳搶客添！
豪伯唔知新加坡環球影城係咪以香港為假想敵啦，如果真係嘅話，咁就未免太過不自量力喇。香港本身就係一個大片場啦，要睇鬧劇，我哋現成就有一套《燈膽權與親家》上映緊，新加坡朋友依家買機票趕嚟睇都仲趕得切。驚慄片方面，觀眾更加有眾多選擇，遊客可根據個人口味，選睇《公立醫院輸錯血》/《打錯針》/《割錯乳》等不同劇目。如果鍾意史詩式長篇巨構嘅觀眾，《十大建設興衰史》就啱晒你，包你十年後再睇番，「興」嗰部分都未做完呀！

拜拜熱狗巴士

少個選擇焗人搭貴車
巴士公司決定淘汰「熱狗巴士」，被人批評話係變相加車費逼人搭貴車。咁又難怪嘅，大家不妨留意吓啲巴士站吖，大把公公婆婆寧願等耐啲，都要坐架平啲嘅「熱狗巴士」。
或者巴士公司會咁講啦：我哋都係為大家好，天時暑熱畀架涼啲嘅車你哋坐，等你哋舒服啲唔好咩？但係細心諗吓又有問題喎，茶餐廳凍飲收貴啲，等人可以消吓暑舒服啲，但係都唔會話取消晒所有熱飲啩？仲有呀，有啲所謂「空調巴士」，根本同蒸籠冇乜分別，我夠坐得唔舒服啦，又唔見可以退番部分車費。
其實講到尾，作為消費者都係想多個選擇啫，都唔算太過分啫吓話？

紀律部隊加人工

扶貧紓困就牙痛咁聲
大家果然冇估錯，政府經過一輪「考慮」後，最終都係向紀律部隊屈服，八成紀律部隊人員即時變相加薪，政府每年花喺紀律部隊嘅錢，當堂多咗七億幾！
真係講起都激氣，呢個咁嘅特衰政府，叫佢扶吓貧紓吓困，慘過畀人舂兩拳，仲威脅話如果長期推行紓困措施嘅話就要加稅。哦，依家每年大手筆使近八億改善紀律部隊嘅待遇，就眉都唔皺一下，咁算點先？
不過鬼叫你冇得佗炮，冇厘power，邊個會驚你呀？老實講，都預咗畀班紀律部隊任劏（我係指個荷包）o架喇，豪伯我只有一個卑微願望：第時政府唔好再浪費納稅人嘅錢嚟登紀律部隊招聘廣告，反正咁嘅筍工本身都已經爭崩頭啦！

成功爭取失業率微跌

勞工之友唔照失業人口
勞福局局長張建宗興高采烈咁出嚟話畀大家聽，本港就業市場已經趨向穩定，但係原來失業率只係微跌咗百分之零點一咁大把咋！
張局長對於咁小成績就沾沾自喜，香港人都咪話唔驚。豪伯曾經睇過某位區議員掛嘅街板，上面大大隻字寫住「成功爭取此綠公仔燈延長兩秒」，嘩！真係豐功偉績，街坊真係多得你唔少囉！老實講，大家覺唔覺張局長「成功爭取失業率下降零點一個百分點」，同「綠公仔燈」街板好相似呢？
喂！咪住，乜張局長唔係「勞工之友」咩？點解唔幫吓啲失業人士早日搵到工？可能失業人士唔算係「勞工」，所以唔喺局長朋友之列啩……

電子垃圾危機

手機主人污染性更甚
本港電子垃圾造成嚴重環境污染問題，但計我話，手機產生嘅有形電子垃圾都係其次，手機主人對環境造成嘅污染，分分鐘仲大過手機本身呀。
大家搭過公共交通工具都知啦，依家啲人好鍾意大大聲講手機，好似慌死人哋唔知佢哋啲私人嘢咁，強姦旁人耳朵當等閒，謝安琪首《私隱線》可說道盡我哋呢班苦主嘅心聲；仲有啲人講嘢大聲到一個地步，直頭要將手機當Walkie Talkie咁用。
講到電子垃圾，起碼環境局都叫做整咗幾架用嚟回收電子產品嘅車吖，但係更加嚴重嘅係「人禍」，佢哋仲識自己上車添，唔知當局又有冇好計解決呢個問題呢？

屋邨西醫罷診潮

領匯變咗羅禮士細佬
領匯真係厲害，竟然有本事搞到醫生都搞罷診抗爭，有西醫工會組織反映，過去一年有唔少公屋西醫因為領匯大幅加租兩至三倍，頂唔順之下惟有提早退休。
其實領匯咁做，咪又係想招攬連鎖大集團呢一類高質素租戶！但係恐怕領匯打錯如意算盤啦，佢哋乜嘢商戶都可以蝦，係唔可以蝦醫生嘅。大家諗吓，冇晒屋邨西醫聽診，你話邨民有咩傷風咳嗽頭暈身㷫起上嚟可以去邊度睇醫生呀？咪又係去睇政府門診，邨民喺唔病死都排隊排死嘅情況下，相信好多有小病都由得佢，到時佢哋係咁喺商場播菌，搞到成個商場生人勿近，最終領匯咪又係變咗羅禮士個細佬—羅禮瑞（攞嚟衰）！

黃金寶山東變爛銅

內地保安劣迹斑斑
香港單車健將黃金寶喺山東為全運會訓練期間，慘遭練習場地嘅保安推跌落地。想當年黃金寶喺香港啱啱踩單車時，乜嘢支援都冇，連比賽用單車都要問人借，點知依家返到內地又畀人恰……依家換咗武警守個場地都好嘅，不過阿寶記得唔好指手畫腳喎，你知班武警幾惡㗎啦！
講起內地保安，又真係劣迹斑斑，推人落地算係小事，試過有商場保安捉到個女小偷，竟然惡到帶返辦公室，要求對方除衫畀佢「檢查」清楚，令人髮指。不過論惡，點都唔及城管！佢哋內部有本叫《城管執法操作實務》嘅「武功秘笈」，教導城管人員點樣喺執法時做到對方「臉上不見血，身上不見傷，周圍不見人」，問你怕未？

慳電膽現金券有幾環保﹖

呢頭慳電嗰頭嘥紙
煲呔曾成份施政報告最實牙實齒嘅，竟然係嗰一百蚊慳電膽現金券，吹脹！
最好笑嘅係，雖然慳電膽節省電力，但電力公司可能根據利潤管制協議加電費；二來竟然用紙印現金券出嚟。大佬呀！長者醫療券都電腦化啦，你仲喺度濫伐樹木，咁唔環保㗎！
不過依家環唔環保都冇所謂啦，大家一早已經將焦點放晒喺疑似利益輸送事件上面，如果我係煲呔曾嘅話，一定會將計就計，咁樣同市民交代：「呢件事話畀大家聽，其實環保同商業並冇矛盾，一樣可以大把商機！」跟手乘勢喺本港大學開設更多同環保有關嘅學位課程，咁到時咪可以一次過惠及教育同環保呢兩個「優勢產業」囉！

施政報告冇料到

原來好有教育意義
各界狠批煲呔曾份施政報告「冇料到」，其實大家只要仔細少少睇，會發現原來份報告好有教育意義！
1.英語課：究竟Bow Tie keep抑或係Bow Tie keeps啱呢，原來要睇吓當時語境，究竟係指令句定係陳述句，至於兩者有咩分別，有興趣可以查吓小學英文教科書。
2.中文課：話煲呔曾係語文大師，相信冇人會反對。之前已經有「康長」（冗長之誤讀），今次又自創四字詞「歸本實份」，（斷估同賭錢有關？）青少年聽得多佢啲反面教材，語文水平大升可期。
3.德育課：冇咁大個頭唔好戴咁大頂帽，冇錢咪住偏遠啲囉，知冇？

港鐵陷阱多多

細路練跳遠勝地
港鐵陷阱多，對小朋友嚟講更係龍潭虎穴。
就以活板入閘機為例吖，多次發生拍親細路嘅事件，港鐵竟然解釋係因為小朋友太矮，個閘機感應唔到有人。咁講即係分明當人冇到啫，咁點解仲要人買飛呢？就算順利入到閘，去到一啲未有幕門嘅港鐵站，一樣咁危險，睇怕除咗等父母可以畀細路喺列車未埋站前「屙殊殊」，仲可以等列車埋站之後，畀小朋友練習跳遠項目—你知啦，有啲港鐵站個月台空隙，仲闊過藝人「大口青」個口，小朋友細個經常練習上車，大個咗分分鐘可以代表香港參加奧運。
下次小朋友曳曳，父母只要講一句「帶你搭港鐵」，包保聽教聽話。

鮮菜當垃圾

菜統處為保佣金冇陰功
開講有話：「食得唔好嘥。」點知依家本港每日有成一噸新鮮菜被棄置。菜統處為咗保障自己中介服務佣金利益，寧願將每日賣剩嘅新鮮菜扔掉，你話係咪冇陰功呀？
打開報紙一睇，幅相真係好鬼震撼：一片綠油油嘅海洋，唔知仲以為係當局繳獲咗一大批有毒蔬菜，收集晒喺度，就好似內地將大批盜版光碟堆埋一齊，然後用壓路機壓碎晒，畀傳媒錄影嗰種大陣仗。
咁就慘啦，盜版光碟害人害物，點同食菜咁有益健康呀。不過咁都好嘅，你知啦，最近大學做咗個研究，話發現好多肉類都可能含抗藥性大腸桿菌，搞到市民都唔知去邊度搵安全食物。依家唔使驚啦，去菜統處「蔬菜堆填區」啦，包你食到放心菜呀！

白車當的士？

市民慘被抹黑
消防處早前抽查召喚白車個案，發現當中只有一成屬非緊急個案，同保安局之前話五成係非緊急個案，差天共地喎，咁究竟市民應該信邊個先？市民慘被抹黑，又可唔可以好似台灣食肆告「網上食神」咁，告特區政府誹謗呢？
點都好啦，一樣米養百樣人，部分市民濫用白車在所難免，但代唔代表可以整個乜鬼嘢「白車召喚分級制」出嚟，搞到有需要人士好似要考試合格後至可以坐到白車去醫院咁？
其實電影都一樣有三級制啦，又唔見戲院盤問所有入場睇三級片嘅觀眾？頂多只係開場前警告吓啫！有人濫用白車，你咪重罰佢哋，收番成本價囉！

周一嶽應該攞諾貝爾

咁都未暴動維和有心得
奧巴馬獲得諾貝爾和平獎，世界會唔會和平就唔知，但分析家嘅眼鏡跌到周圍都係，眼鏡製造商呢鋪發囉！
真奇怪，今次和平獎人選公布後，各界唔係第一時間恭賀得主，而係幫諾貝爾委員會搵個合理解釋出嚟。既然係咁，我哋周一鑊都可以攞諾貝爾和平獎啦！冇聽錯呀，係和平獎而唔係醫學獎呀。大家諗吓，公立醫院幾乎日日打錯針輸錯血，香港都冇暴動，如果周一鑊肯公布有乜法寶令到港人咁溫順，和平獎實係佢攞硬啦！
有人話喎，頒個和平獎畀奧巴馬，係鼓勵佢往後幾年做得好啲。嘩，如果咁都講得通，咁我哋成個特衰政府管治得咁差，咪仲需要「鼓勵」？

食神咪亂做

參考新聞寫作手法
台灣有大學生喺網上寫咗幾句食評，結果竟惹上官非，被批評嘅食肆入稟法庭告佢誹謗。香港一眾山寨食神立即人人自危，擔心此例一開，自己以後恐怕只能評論「皇家食堂」嘅食品矣。
惡意中傷當然唔啱啦，但係口味呢家嘢始終係主觀嘅，以後大家寫「碟嘢太鹹」嘅時候，到底會唔會畀人話「誹謗」呢？大家真係要認真諗吓喇。計豪伯話，以後寫網上「食評」嘅朋友，應該倣效新聞寫作手法，盡量避免用主觀判斷語，例如可以咁講：「在XXX吃了炒牛河一碟三分鐘後嘔吐大作，嘔吐物約三磅重；半小時後將同一碟牛河給家中小狗吃，小狗口吐白沫身亡，死因有待詳細科學調查……」

o靚模大學講座冇料到

同學抱非理性期望
o靚模周秀娜科大開Talk，結果畀人話佢答非所問，不過亦有唔少人批評發問嗰位教授，話佢問埋晒啲問題九唔搭八，點樣「梳理自己」喎，你估多毛狗咩？娜姐唔識答係正常嘅！
講到底，都係參加呢個座談會嗰啲同學唔啱。大佬呀，模特兒嘅工作係行天橋出Show，而你哋竟然期望聽完佢講嘢後有文化上嘅得着，試問咁樣同搭完一程巴士，然後批評個巴士司機冇提供六合彩貼士有咩分別？
唉，呢個社會一早亂晒龍啦，歌星可以走音但唔可以教壞細路，娜姐作為o靚模，竟然無啦啦畀人請咗去大學做「文化對談」，真係唔慌唔要問一句「我是誰」囉！

科研當係草

得把口講㩒實荷包
「光纖之父」高錕獲諾貝爾物理學獎，煲呔曾即刻發表聲明話係「香港驕傲」。之但係如果香港教育制度真係咁厲害，高錕又使乜遠赴英國深造？香港又係咪應該產生好多頂級科學家呢？
老實講，高錕話晒喺香港讀過書、做過校長，今次港府抽水都算近磅㗎喇。講開又講，豪伯係廣東高要人，大家都係「高」，唔知我可唔可以話高錕攞獎係「高字輩」嘅驕傲呢？
要真正發展科學，唔係口頭佔吓便宜就得，不如實實際際攞錢出嚟資助科研啦，我哋祖國每年投放喺科研嘅錢佔總產值百分之一點五，香港得百分之零點八咋陰功！仲話創新科技係六大優勢產業喎，笑死人啦！

大學生周身債

採取學費浮動制最公道
家陣搵食艱難，有消息話政府研究將學生最長還款期延長去到十三年，但學生必須支付延期利息同風險利率。
不過，學生哥對呢項建議似乎唔多受落喎。鬼咩，就業環境改善唔到，搵埋唔夠養自己，分三十年還都冇用啦。老實講，有頭髮冇人想做癩痢，除咗少數唔生性將學生貸款攞去炒股票嘅之外，大部分人都想早日還清學債，搵唔到食，有咩法子呀？所以計我話，最好辦法係規定學生將來月入嘅若干比例用嚟還債，多有多還，少有少還，踎緊躉嘅當然有拖冇欠啦；當然最公道係採取「學費浮動制」，根據各學科應屆畢業生嘅入息中位數來釐定學費，童叟無欺，一個願打，一個願捱，公道到極啦！

青少年公德淪亡

清潔工作長做長有
中秋節過後全港郊野公園慘變垃圾崗，有清潔工人反映，好心叫啲o靚仔將垃圾包好，點知被人窒番轉頭，話「我哋唔將垃圾掟落地，你哋邊度有工開」！嘩，呢班後生仔都算陰毒囉，依家經濟不景，咒人哋冇工開，幾乎衰過殺人全家呀！
但計我話，就算「米飯班主論」成立都冇用。大家有冇留意一段新聞，話有個債仔被收數佬上門追數，一怒之下揮刀怒斬之，結果兩敗俱傷一齊送院治理。嗰個債仔當初係咪應該同追數佬講：「我哋全部自動自覺準時還款，你哋邊度有工開？」
不過，清潔工人可以定，因為年年中秋都有呢班「垃圾青年」出嚟搞搞震，你哋份工實長做長有！

放低幾両救地球

大條道理收肥人附加費
講到屎屎尿尿，大家唔好即刻皺埋眉頭，原來同環保大業息息相關㗎。最近有航空公司呼籲旅客上機前先「放低幾両」，等機身輕啲，排放少啲二氧化碳喎。
咦，咪住先，咁簡單就救到地球？有冇咁筍呀？啊，我明喇，如果乘客以後都自動自覺喺上機前「放低幾両」，並且被大家讚賞有環保意識嘅話，咁即係話「體重愈輕愈環保」呢個理論成立啦，咁以後航空公司係咪可以大條道理向肥人徵收附加費？發展落去，可能會要求乘客上機之前先磅吓重，然後按照比例收唔同價錢嘅機票喎！
發展到呢個地步，以後恐怕只有呃秤最叻嘅香港燒臘店老闆至有機會買到平價機票矣！

鹿頸堆填區

地盤趕工反映經濟回春
本港生態保育重地之一嘅鹿頸，最近畀人利用作非法傾倒地盤建築廢料嘅場地，綠草如茵嘅濕地慘變「垃圾堆填區」，環保人士見到真係欲哭無淚。
依家傷害已經造成，就算掟西瓜落海都未必可以嗌得番個濕地返嚟。大家不如諗吓，除咗鹿頸變身堆填區外，上水河上鄉一幅菜田都試過畀人非法傾倒建築廢料啦，足以證明本港經濟回春，有唔少地盤正十萬火急咁趕工，如果唔係，點解連行遠少少合法傾倒廢料都唔得閒呢？
不過都係算罷啦，嗌得番個濕地返嚟咁又點吖，政府推廣綠色旅遊闊佬懶理，乜嘢配套設施都冇，唔使講其他吖，好多行山地點連九九九都打唔通呀。個濕地擺喺度都係嘥晒，唔慌會益到市民多個郊遊地方啦。

大坑舞火龍申遺

難敵政府崇洋心態
最近有消息指政府有意將大坑舞火龍活動申遺，以為呢項傳統可以繼續發揚光大啦，點知有舞火龍搞手喊咁口，話原來一直以嚟港府都闊佬懶理，加上又唔夠男丁參與，再係咁落去，「火龍」遲早好似「恐龍」咁絕種。
咁又係呀，你睇吓粵劇吖，夠成功申遺啦，啲老倌咪一樣呻，叫政府唔好淨係將資源放晒喺發展管弦樂同芭蕾舞，應該好好珍惜粵劇呢種本土文化啦！哈哈，要特區政府唔崇洋媚外睇怕難啲囉，大家睇吓活化北九龍裁判法院呢單嘢就知啦，寧願交畀名不見經傳嘅美國機構都唔畀八和會館。非物質文化遺產咋喎，你估政府真係會好似爭奪富豪遺產咁落力咩！

o靚模殺入大學開talk

大家唔好再話o靚模冇文化喇，周秀娜今個月七號就殺入科大，出席一個解構o靚模現象同o靚模風氣利與弊嘅講座，其他講座嘉賓仲包括前高官添，o靚模直頭由性感女神進身為文化大師呀！
但咪住先，請周秀娜嚟解構o靚模現象，似乎就有啲商榷餘地嘞。大家諗吓啦，如果o靚模可以解構o靚模現象，咁試問農場裏面嘅乳牛，又可唔可以解構成個乳製品市場嘅發展模式同前景呢？豪伯咁講，絕對唔係想貶低啲o靚模，只係想話「當局者迷」，「解構」重任，都係留畀一眾專家去做啦。
計我話，無論o靚模「解構」又好、「解扣」也罷，總之眼睛有得食冰淇淋，豪伯一律無任歡迎也！

粵劇抗吸毒援交

等學生咿挹時間都冇
粵劇除咗長者鍾意之外，原來唔少後生仔女都有興趣。有間學校仲叫啲同學仔女學粵劇，等佢哋有番啲細藝，唔使咁得閒走去索K又或者援交，唔知大家覺得呢一招「粵劇抗吸毒援交」使唔使得？豪伯我就絕對支持嘞！
先講援交問題。《帝女花．香夭》都有得唱啦：「偷偷看，偷偷望，佢帶淚帶淚暗悲傷」，公主對住駙馬都要「偷偷望」，點會好似依家啲後生咁，三句唔埋就要喺樓梯咿挹，更莫講話援交啦！至於索K問題亦唔難搞。你知啦，家陣睇大戲有咩場地呀，嚟嚟去去得個新光戲院，高山劇場個場地到依家都好似冇厘聲氣咁，粵劇迷為更多演出場地抗爭都唔得閒啦，仲邊有時間去索K呢？

百萬貧窮大軍

政府餓死窮人當「滅貧」
最近統計數字顯示，本港貧窮人口達到一百二十四萬。呢個數字似乎令隔籬小白兄好唔開心，認為計漏咗我哋兩個窮鬼，實際本港應該有一百二十四點零零零二萬個窮人至啱。不過計我話，無論一百二十四萬，抑或一百二十四點零零零二萬都好，反正好似史太林話齋：「一個人死，是悲劇；一百萬人死，則是統計數字。」可能正因為咁，特衰政府先至會麻木不仁，講到明唔會喺施政報告裏面再派糖啩？
不過咁，就算呢一百二十四萬窮鬼真係全部餓死晒，都未必唔係一件好事，大家諗吓嘞，與其辛辛苦苦扶貧滅貧，倒不如直接同「窮魔」同歸於盡，連個窮人本身都窮死埋，費事佢哋一下唔小心又生幾件，咁到時香港貧窮人口將會呈幾何級數增長！

報販人肉吸塵機

拍硬檔幫環保署慳番筆
近日福建省上杭有大批兒童鉛中毒，當地官員解畫，話兒童鉛中毒係因為食得爆谷多，堪稱醫學界嘅一項重大發現。
好彩喺「重大發現」呢方面，我哋香港都唔執輸。最近有環保團體發現，繁忙街道旁嘅報販，除咗賣報紙同雜誌外，仲有一項重要功能，就係做「人肉吸塵機」嘞。其實計我話，如果想知香港空氣質素有幾差，與其靠環保署公布嘅一堆冷冰冰數據，倒不如落街買份報紙，如果你發現個報販係咁氣促、呼吸困難，咁就唔使問，空氣質素好極有限。所以除咗應該開發報販嘅吸塵機功能，仲應該進一步搵佢哋做埋「人肉路邊監測站」啦，咁樣環保署就可以慳番購置器材嘅錢啦！

哈囉喂臭鬼

為「鬼」出番啖氣
哈囉喂「臭鬼」呢單新聞可以話嚟得絕對合時，聯合國啱啱舉行完氣候變化峰會，連秘書長潘基文都話依家談判進展太慢。千祈咪以為氣候變化呢味嘢唔關你同我事，大家試諗吓，往時九月、十月，天口已經開始涼涼哋，歌仔都有得唱：「秋來也秋去，千千片紅葉跌墜」，依家？睇怕大家除咗「秋官效應」之外，都冇乜機會接觸個「秋」字囉！
「臭鬼」喺哈囉喂前出現，正好幫大家糾正態度—大家咪以為「鬼」好恰呀，以前搞親嘩鬼show，都發生啲客人「打鬼」事件，甚至有「女鬼」聲稱被男遊客掃背脊騷擾，依家「臭鬼」出馬，即刻嚇番班友仔轉頭，直頭係出鬼番啖氣呀！

《風險通報》得人驚

打擊醫護士氣罪大惡極
《風險通報》期期有新料，唔係打錯針、輸錯血，就係割錯乳房，再唔係就索性留低幾件醫療用品喺病人體內。哈，話時話，唔知邊個改個咁傳神嘅名呢？《風險通報》，向邊個通報呢？梗係向病人通報啦—入醫院咁鬼危險，隨時冇命—唔通向醫生通報咩？反正又唔會有人因失誤而受罰嘅！唉，不過都係唔好講咁多喇，一陣人哋士氣受到影響，唔開心之下又做錯嘢，咪盞惡性循環！
作為一個文字工作者，見到香港嘅醫療事故無日無之，真係唔愁寫嘢冇靈感，終於知道乜嘢叫做「國家不幸詩家幸」嘞。不過呢種「幸運」建基喺病人痛苦之上，寧願冇好過咯！

拜拜龍門大酒樓

「集體回憶」好短暫
見證灣仔變化嘅舊式酒樓灣仔龍門大酒樓，始終都係逃唔過倒閉嘅命運，就嚟要同大家講聲拜拜啦。想緬懷酒樓最出名嘅大包同炭燒叉燒，就要趁住酒樓十一月結業前去啦。香港人又少咗一個集體回憶，固然可惜，但諗深一層，其實香港人都幾慘，得六十年咁短暫嘅歷史，就已經搞到好珍貴咁嘞，其實莫講話龍門酒樓啦，新光戲院只有三十幾年歷史，都已經成為港人集體回憶，香港保育有幾成功，不問可知啦！
不如咁啦，大家由聽日起，買成疊報紙派畀街坊，又或者拎支結他走上街頭娛樂大眾，只要你夠恒心，堅持二、三十年，話唔定閣下都可以成為香港「集體回憶」喎！

明星大格鬥

出唱片送「路牌」包賺
曹格鬥側田呢齣真人騷，全城哄動。事件揭發原來一般青少年好無知，如果見到班明星打交，會有樣學樣，聽日隨時帶埋開山刀返學校開片。話時話，你睇吓我哋側田哥呀，基本上無還手之力，真係慘不忍睹。好彩東亞運馬來西亞冇份參賽，否則實畀佢哋攞晒武術項目嘅金牌啦！
不過呢件事又唔係全無積極意義嘅。依家大家都話，時下嘅歌手出路愈來愈窄，收入愈來愈少，淨係靠出唱片實聽乞米。依家啱啦，兩位仁兄可以開多條求生手藝，就係做武打明星。再唔係，可以在「唱作歌手」之外，殺出一條「動作歌手」嘅血路，下一張唱片推出時可以學公仔書送兵器咁，加送模型路牌一個，包賺！

港女大鬧建材店

港女短片信心保證
港女大鬧建材店，相信大家都睇咗片，毋須豪伯在此多講啦。呢件事反映大家已習慣咗用「港女」一詞，一見段片同港女有關，即刻知有熱鬧睇，難怪喺網上熱爆。
事實上，港女可以話係繼「醜陋的中國人」之後另一個偉大發明──中國人梗唔係個個「髒亂吵」同「窩裏鬥」啦，正如香港女仔唔係個個都崇尚名牌、鍾意發小姐脾氣。至於點解港女同醜陋的中國人一樣叫到開巷而冇乜人反對，女士們自己都要檢討吓喇。
不過港女們都未必冇得救嘅，起碼中國人喺外國守秩序，畀人以為係日本人大家聽得多，但就好似未聽過香港女仔斯文大方而被人誤認係日本妹囉！

無車日做騷日

三百六十四日都係有車日
啱啱過咗國際無車日，高官們就算幾心不甘情不願都好，都要出嚟做吓騷搭巴士又或者行路返工。至於有冇用，外界就似乎唔係太樂觀嘞。好簡單，只係唔坐私家車一日咁大把，一年裏面嘅其他日子，咪又係大放特放溫室氣體！
之前咪話啲高官一個二個鍾意用幾千cc嘅大馬力座駕，畀環保團體插到飛起嘅，喺呢度我都要為班高官講番句公道話，講真啲車外形又真係幾靚，如果豪伯我有錢都會買番架。大家有冇睇電影《波叔出城》呀？波叔喺哈薩克故鄉架私家車都係相當豪華㗎，不過係用隻驢嚟拉咁解，只要特區高官學習波叔精神，咁就算日日係有車日都環保到極啦！

烈火雄心打救人

氣上心頭認錯係上司
真係奇怪，同樣係打，消防員打排球大家就鬼殺咁嘈，但係打企跳女子大家就拍爛手掌……
冇錯，消防鐵漢使用適當武力，可以避免企跳女子反抗而跳落街，係無可厚非。如果班消防係不安好心嘅，大可以扮晒嘢捉住個女人，然後順手推佢落街，仲要扮晒遺憾咁大嗌：「嗚……點解我救唔到佢呀……」但問題係，點解救人期間好似打唔夠咁，入到屋仲要「舂」多幾拳？
照計消防鐵漢同呢個弱女子無冤無仇，唔使咁落力㗎，比較合理嘅解釋可能係，消防員班飛將軍救人時得一條單繩保命，反映極上級都唔肯幫佢哋加裝備，一時氣上心頭，當個企跳女子係佢哋上司，咪起勢咁揼囉！

港產美食維權運動

幫香港腳申請專利好過
馬來西亞旅遊部長計劃將海南雞飯同辣椒蟹等申請專利，將佢哋列為「馬來西亞美食」，豪伯認為，呢個行為相當之無聊。大家諗吓嘞，就算畀佢哋成功申請到專利，而鄰國新加坡仍然有舖頭打正旗號賣「地道辣椒蟹」，唔通真係發動戰爭咩！
所以計我話，香港雖然有茶餐廳奶茶等多種美食，但係申請成專利都冇乜着數，要申請專利，不如為「香港腳」申請好過。大家都知啦，呢種皮膚病又唔係香港發明，但係我哋就無端端背負呢個惡名咁耐，倒不如將錯就錯，將佢列為「香港原創疾病」，邊個外國人患上，一係就收佢「專利費」，一係就規定用本港藥廠出嘅藥物，咁樣先至啱數！

明愛見錢救眼

不如鎖病人防走數
公立醫院又發生見錢才救人嘅醜聞。明愛醫院接收七歲小童，因為佢未能出示身份證，而堅持收取非本地人嘅七百元，結果男童父親拎番身份證才肯救人，但已延誤咗四小時醫治時機。
明愛醫院繼見死不救後又爆出見錢救眼醜聞，真係離晒大譜，七百蚊其實唔係一個大數目啫，點解明愛搞到好似等住嚟開飯咁呢？
其實明愛醫院嘅前線員工真係好唔識變通，依家都係無非驚病人走數啫，可以學吓內地啲同行咁，唔理三七廿一醫咗先，最多都係醫好咗之後，用手銬將病人鎖喺病床上，唔畀佢哋走啫。又或者咁啦，搵幾個男警員守病房，女病人全部唔敢嚟，可為醫院減低一半負擔。

2009深山大野人

練功要識揀地方
呢排「深山」似乎特別多新聞，好似《蠟筆小新》作者臼井儀人咁，入咗深山之後到依家都未見人，惟有希望佢真係同「pat pat外星人」一齊玩啦。臼井係咪同外星人一齊玩咁神奇就唔知，但係香港土產嘅深山大野人就肯定神力無窮，事關有街坊曾見過佢獨力抬起碌倒塌咗嘅電燈柱去變賣。
不過大家千祈咪學呢位伯伯，以為吸收天地靈氣就可練得一身好武功。大家都知啦，香港好多熱門行山地點都冇手機網絡覆蓋，有啲地方甚至連九九九都打唔出，入到去名副其實與世隔絕。除非你入到深山之後練成埋特異功能，可以用腦電波隔空同其他人溝通啦，否則睇怕未得道已經升仙矣！

房署訂「車立」搞錯size

房署解釋愈描愈黑
房屋署喺啟業邨裝新，點知size唔啱，工程要延期完成。呢單蝦碌嘢令豪伯諗起《老夫子》一個古仔：老夫子忽然心血來潮，買咗兩尊石獅子返屋企擺，點知屋企門口太窄，卒之搞到要放喺走廊算數。
不過政府搞錯size都唔係第一次㗎喇，正如網友卜勤話齋，政府當初搞迪士尼樂園，咪又係搞錯咗size，不過呢鑊係太細而唔係太大咁解啫。房署解釋話喎，舊圖則顯示大廈係磚牆，但實際上係石屎牆，加上架缺乏部分物料，所以先至要重新審批工程。唓，講到好似搞錯物料好過搞錯size好多咁，太空人試吓着對啱size嘅白飯魚上太空吖，睇吓會點！

金融海嘯周年祭

鬍鬚曾預測經濟鋪鋪錯
乜啲專家唔係話呢劑金融海嘯可能係上世紀三十年代大蕭條以嚟最大鑊嘅一次咩？講到經濟復甦，就更加係英文字母滿天飛，又L又U，梗係唔見個V字。咁點解短短一年後，鬍鬚曾居然可以振臂一呼，話本港經濟已經「喺隧道見到曙光」？
好彩香港人出晒名鍾意賭錢，賭仔都鍾意睇往績，就算同「往績」完全無關嘅大小、六合彩等都唔例外。好嘞，睇番鬍鬚曾以往講親經濟預測、赤字預算，以至「釘木板」可以抵抗金融海嘯等，次次都係錯，所以佢呢鋪話香港經濟露曙光，根本冇人會跟佢「下注」。簡單啲講，香港人都知聽鬍鬚曾老點，會好似師傅話齋：「出事㗎嘛！」大家一早已經睬佢都傻矣！

香港威尼斯

阿豪觀點：發預警短訊免問責
次次打風，大澳都會變成澤國，今次「巨爵」襲港都唔例外。其實有時真係戥我哋做傳媒嘅慘，政府次次水浸完都大耍官腔，又話幾時可以起好個防波堤、又話會做好部門間協調，成架人肉錄音機咁，又唔見報紙可以照dup上次水災篇新聞、電視台可以播番舊片！
最搞笑係，民政事務總署署長陳甘美華話當大澳可能發生水浸時，會向居民發出預警短訊，提醒佢哋將貴重物品搬去較高嘅地方。呢個短訊嘅潛台詞係咪話：「嗱，依家浸就浸梗㗎喇，咪旨意政府幫到手保障市民生命財產，唔該自己執生。」咁以後警方係咪可以發短訊畀市民，提醒大家依家正身處罪案黑點，麻煩大家買定棺材呢？

港人勁撐迪士尼

拜託樂園咪起分店
香港人出名有愛心，無論係四川地震，抑或係台灣水災，甚至係遠至南亞嘅海嘯，都見到香港人嘅善款。如果香港發生大災難，港人就更加會義不容辭咁幫手，好似迪士尼樂園咁呀，開幕以嚟入場人數長期低迷，但係喺港人鼎力入場支持下，依家人數已經超過內地同埋東南亞旅客嘞。
幫人係好事，但都要幫得其所，正如捐錢畀災區都要目及實當地政府有冇用嚟重建，迪士尼都一樣，好快啲執番靚啲景點設施；而如果將港人同迪士尼樂園比喻為情侶，咁我哋喺你落難嗰陣照顧你，你係咪應該修心養性咪再拈花惹草呢？拜託迪士尼樂園唔好始亂終棄，成日話要喺四周圍起分店啦！

古蹟辦霸古蹟

曲線保育用心良苦
古蹟辦將有過百年歷史嘅前英童學校改建成辦事處，惹嚟一片責難之聲。其實，今次大家真係錯怪好人喇！
大家有眼見㗎啦，唔理有幾多集體回憶、有幾耐歷史，政府話拆就拆，之但係政府部門落戶嘅建築物就唔同喇！好似話旺角洗衣街水務署同食環署倉庫咁吖，叫咗好多年都仲係賴死唔走；仲有依家佔用緊鰂魚涌公園嘅警務處同食環署等三個政府部門，都係遲遲唔肯搬，搞到公園都擴建唔到。
所以話，古蹟辦用前英童學校做辦事處，莫講話確保唔會被拆，假以時日，直頭有機會向聯合國申請成為世界遺產，絕對係曲線保育嘅一記妙着。

情慾短片有乜好睇﹖

滿足晒你多個願望
睇情慾短片，可以滿足大家多個願望：
—幸災樂禍。大家可以一邊惋惜：「該煨囉，如果係我（或我個仔女），你話以後點見人？」一邊好開心咁想像主角父母嘅反應。
—做動作指導。武打片或AV嘅演員經過訓練，但係情慾片由素人演出，我哋大可以指手畫腳：「呢個位拗前啲吖嘛，識唔識o架你？」
—做聖人。情慾短片一出籠，即時義正詞嚴怒吼：「有冇搞錯呀，依家啲後生仔女都唔識尊重自己同別人嘅！」之後再補句：「可唔可以send條link過我呢？」
—（主角）做明星。觀眾人數多過喺戲院上映嘅港產片。呀！着咩衫去金像獎頒獎禮好呢？

應不應建狗泳池？

狗主罰款夠康文署加薪
對於屯門起狗泳池，豪伯相信康文署會舉腳贊成。
大家知啦，康文署管理嘅公眾泳池一團糟，三日唔埋兩日就出現「浮金」，起咗狗泳池後就唔使驚啦，事關狗隻喺公眾地方大小二便，狗主有責任清理番佢，到時話唔埋會有人專程入屯門，睇人表演潛入水底用報紙包起狗糞呢一項高難度動作添！此外，狗主整污糟公眾地方嘅千五蚊定額罰款，集腋成裘絕對唔嘢小，所得隨時可以幫全體康文署官員逆市加薪添！
不過政府咪咁快開心住，不患寡而患不均，因住其他養寵物人士好似紀律部隊咁扭計，呢個話要起貓音樂廳，嗰個又話要起錦鯉足球場，到時問你順得邊個意！

香港「針禍」勁過新疆﹖

拮針黨天堂冇人要孭鑊
新疆烏魯木齊家陣人心惶惶，個個聞針色變，不過香港都唔好得幾多，最近連串打錯針事件，包括初生嬰打過期卡介苗以及最近嘅「打針漏疫苗」烏龍事件……
將香港「針禍」同烏市比較絕冇誇張，大家諗深一層，烏魯木齊搵針拮漢人嘅係維吾爾族人，點都叫做有樣認吓吖，但係香港拮針黨成員都係同我哋一樣樣嘅醫護人員，令人防不勝防。
另外，新疆話晒都叫怒炒咗烏魯木齊市委書記同自治區公安廳廳長吖，仲講明要依法嚴懲拮針黨，反觀香港冇官員要為「針禍」負責，直頭係拮針黨天堂啦。
或者香港唯一優勝之處，就係冇記者因為採訪「針禍」而畀人毆打啦！

月餅禁運

中秋前夕宣布明剃眼眉
早前有十五個國家宣布禁收月餅嘅郵件，話係考慮到禽流感同豬流感肆虐喎。嘩！中秋食月餅係我國優良傳統，禁止入口，即係明剃我哋眼眉啫！大家不妨睇吓禁運月餅國家嘅名單，竟然有乍得、蘇丹同緬甸等傳統同中國友好嘅國家，如果你話唔係有敵對勢力喺幕後策動，真係打死我都唔信。
一年三百六十五日邊日唔好宣布，偏要中秋前夕宣布禁令，仲唔係別有用心？雖然喺飲食方面，最愛國嘅熱血青年都未必敢用國貨，但係由外國人禁運就勢係假。我睇同胞們有必要反擊，禁運番對家嘅食品，好似話蘇丹紅雞蛋咁—吓，又係國貨？乜唔係蘇丹出產嘅紅雞蛋咩？

公園危機處處

鱷不群大戰毒菇求敗
唔少有錢人都鍾意反璞歸真，去非洲參加Safari狩獵旅行團，見吓平時冇機會見到嘅動植物。雖然呢味嘢，作為冇錢人嘅你同我一定冇份，但係其實我哋唔使捨近求遠嘅，去康文署公園都得啦！嗱！有鱷大俠「鱷不群」，又有「毒菇求敗」，夠晒熱鬧同刺激呀！
好多人聽到話公園有福鱷同毒菇都好震驚，但係大家又知唔知，本地某電視台一個以金魚做主角嘅節目，其實都有唔少Fans，側聞有觀眾仲幫捧開場嗰條魚改名添！福鱷喺水池出現、毒菇喺公園遍地生，點都合理過金魚喺電視機裏面游嚟游去啩！計我話，電視台將佢哋個生態節目移師去各康文署公園直播，定可砌低對手！

隱蔽大學生等運到

天子門生只值四千蚊
以前有「隱蔽長者」，家陣有「隱蔽大學生」。乜嘢係「隱蔽大學生」？就係嗰啲搵嚟搵去都搵唔到工嘅大學生，屢戰屢敗，最終徹底放棄，但又過唔到自己嗰關，喺羞於求助下索性「柄」埋自己唔見人。
唔知點解，提到「隱蔽長者」，大家一副悲天憫人嘅樣，但講到「隱蔽大學生」，就即刻變臉，更有網友直斥只係偷懶嘅藉口。其實班大學生都好慘，以前就話「天子門生」啫，依家四千蚊實習計劃都要撈住先。計我話，應該取消所有大學，四年大學索性改名為高中四年級至七年級，然後收取番高中水平嘅學費。真正有興趣追求知識嘅年輕人，咪由得佢哋走去報讀高中四年級囉！

前線醫生做到嘔

冇穿冇爛出院要還神
「做做冇停手，梗有食飯嘅時候……」記得呢個經典廣告裏面，唱呢支歌仔嘅係一班地盤工友。時移勢易，呢首歌嘅MV相信都要與時並進，由一班手執聽筒嘅醫生嚟個大合唱。但悲哀嘅係，醫生「做做冇停手」唔係因為經濟好咗，而係因為醫管局肥上瘦下，管理層分分鐘仲多過落手落腳做嘢嘅前線醫生！
十個煲得七個蓋，有乜辦法唔成日割錯器官輸錯血吖，病人冇穿冇爛由公院返出嚟直頭要還神！話時話，你哋班前線醫生爭取增加人手，豪伯我瞓身支持，但係千祈咪借頭借路想加薪呀，除非你同我講，月薪加到一百萬，你哋可以一日做二十六個鐘頭而唔會出錯啦！

人肉白車

萬物之靈自我侮辱
一宗油麻地發生嘅車禍，竟然要調派港島區白車嚟救人？咁都未算啜核，最終都係等唔切白車，竟然要由七人組成嘅「人肉白車」將傷者送院。市民聽到呢單嘢不禁怒問：當局仲話搞埋晒啲咩嘢「白車三級制」，幾乎查過你三代至放架白車出嚟救人，依家有人畀車撞到頭部重傷呀，仲唔夠緊急呀？咪一樣冇車嚟救！證明根本你哋自己唔夠車，然後就賴市民濫用。
大家知道人類作為萬物之靈，同其他生物最大嘅分別，就係識得利用工具，家陣坐喺冷氣房度班高官，逼到啲前線員工退化到要扮「人肉白車」，直頭係反人類罪行，捉佢哋去海牙國際法庭審都仲得呀！

弊傢伙，公園有「鱷魚」﹗

政府專虐畜咪亂放生
康文署多個公園驚現「鱷蹤」！好消息係，講緊嘅「福鱷」又名雀鱔，並唔係真正嘅鱷魚，大家下次一家大細行公園，唔使搵埋番禺嘅「鱷魚釗」護駕。但壞消息就係，福鱷係淡水界十大惡魚之一，雖然唔會主動襲擊人類，但係誤以為遇襲時會突然失常咬人自衞，到時連鱷魚釗都未必幫到你！
唉，其實啲人將福鱷放生，又有冇諗過對方嘅感受、有冇諗過佢哋適唔適應呢？你知啦，動植物公園裏面嘅猩猩「達圖」，康文署都管唔掂，至於漁護署虐待動物一樣「戰績彪炳」，曾經創出焗死過千條水律蛇嘅驕人紀錄。計我話，直頭應該將亂放動物喺政府場地嘅人，以虐畜罪名檢控呀！

「陰宅」渴市掀搶購潮

政府龕位死都未輪到
做香港人真係悲哀，在生時搵唔到錢，要做冇殼蝸牛，好嘞，死咗嘞，以為可以抖吓啦，點知原來「陰宅」一樣咁搶手，早排有團體推售一千個靈灰龕位，墟冚囉，即刻引來排隊搶購熱潮。原來排政府龕位竟然分分鐘要成六年咁耐，真係唔爭崩頭就有鬼咯。就算我今日開始排，都唔可以確保我有生之年真係排到個龕位喎……
你知啦，一個人冇地方落腳，自不然要四圍騰打發時間㗎嘛，第時我喺下面要請願搵個對口單位，咁我應該搵下面嘅「房屋局」呀，抑或搵陽間嘅食環署呢？真係愈諗愈驚。下面通貨膨脹咁厲害，郁吓使錢都幾千萬幾千萬上落，卓署長麻煩做吓好心，等我第時有個安樂窩呀！

口供紙任睇唔嬲

為堵塞警方洩密漏洞，強烈建議警方增聘多名「私隱安全主任」。為表達誠意，豪伯連招聘廣告都幫警隊諗埋：
警隊誠聘私隱安全主任
學歷、身高：不限
主要職責：巡查全港各大小垃圾收集站以及小巴等公共交通工具，如發現包括口供紙等機密文件，立即交回總部。
薪金：參考食環署街道清潔工人或小巴司機水平，視乎被編派的區域而定。
其實上述講法都係講笑。警隊要從根本上杜絕洩密事件，應將所有機密文件直接以廣告形式登喺報章雜誌，到時自然可以達到「本來無一『密』，何處惹塵埃」的最高境界啦。善哉善哉！

禁煙海報串錯字

警告：食煙令人神志不清
衞生署控煙辦印嘅禁煙海報，居然連主角cigarette都串錯成cigaratte，搞笑程度直逼老差骨唔識用槍，仲扭傷自己隻腳。回心一諗，你隨街問一個小學生都知cigarette點串啦，之所以犯如此低級錯誤，必定另有內情。
第一種可能，係控煙辦入面有人不滿待遇繼而抗爭，暗中搗蛋令衞生署出醜。至於第二種可能，就係呢張蝦碌海報，根本係反吸煙策略。你知啦，當局反吸煙一味靠嚇，又話食咗會陽痿，又話食咗會爛腳，咁唔爭在話食煙會令人神志不清啦，連A同E都唔識分，你話幾大劑！See！食得煙多個人零舍易bull sit（唔係串錯字，bull sit即係隻牛坐喺度，形容一個人笨拙也），問你怕未？

告士打道水世界

大條藉口推環保大業
二十三歲嘅人，有啲已讀完大學，成為社會棟樑；如果係一條地下水管嘅話，就只有等待爆裂嘅命運。
話時話，告士打道爆鑊杰嘅，冇錯令到市民好唔方便，但呢件事對環保大業嚟講，絕對係百利而無一害。
大家不妨諗諗，呢條咁繁忙嘅馬路，停用一日之後，有冇死人冧樓吖？冇吖嘛！地球咪又係繼續轉。咁即係話，呢條路其實可以間歇性封閉啦。當局咪曾經建議禁止歐盟三期或以下嘅商業車輛進入旺角、中環、銅鑼灣等繁忙地區嘅，計我話不如索性封晒佢唔畀車入仲好啦！一條殘舊水管，換你一個藍天白雲，賺咗！至於政府識唔識打呢張環保牌，就睇佢哋嘅政治智慧喇！

七月十四

冤有頭債有主
真係奇哉怪也，以前就話農曆新年、聖誕節等大時大節至有應節新聞啫，估唔到家陣連盂蘭節啲新聞都咁應節。元朗屏山達德公所最近傳出鬧鬼新聞，有村民話見到抗英烈士遊魂喺村入面練習步操，都咪話唔得人驚！
中秋節係提醒大家一家團聚幾咁幸福，其實盂蘭節都係一樣—你一定要對先人好啲，否則佢哋實唔肯過你。
呢件事亦都證明下面資訊都幾發達。烈士們睇新聞知道，如果唔係啲公公婆婆走出來抗爭，依家連攞生果金可能都要查過三代至得咯。不過話時話，冤有頭債有主，你哋要操兵遊行抗議，就算唔去上亞厘畢道，都至少去發展局局長官邸啦，唔好嚇親啲村民嘛！

開學有乜準備﹖

帶定乾淨尿看門口
唔經唔覺又到開學，大家唔好以為時下學生哥對開學大日子闊佬懶理，查實佢哋不知幾有準備。最令豪伯我老懷安慰嘅係網友嘅商業觸覺敏銳，識得帶定幾篤乾淨尿返學看門口，從小就滿腦生意經，第時唔怕出社會同人競爭。但係做生意商譽最緊要，千祈咪賣受污染尿液喎！
嫌賣尿唔衞生，咁不如轉行賣口罩啦，家陣日日都有咁多人中招，諗得過喎！
美中不足嘅係，竟然一個二個學生都話要帶o靚模寫真返學，等豪伯話過你哋知，學業為重，點可以咁懶齋睇圖畫唔睇文字o架！要睇就睇才女歌手嘅愛情小說，邊睇邊搵錯字，好過去參加天王補習班，攞A冇難度呀！

開張了～～

阿豪博客開張了