明星大格鬥

出唱片送「路牌」包賺
曹格鬥側田呢齣真人騷，全城哄動。事件揭發原來一般青少年好無知，如果見到班明星打交，會有樣學樣，聽日隨時帶埋開山刀返學校開片。話時話，你睇吓我哋側田哥呀，基本上無還手之力，真係慘不忍睹。好彩東亞運馬來西亞冇份參賽，否則實畀佢哋攞晒武術項目嘅金牌啦！
不過呢件事又唔係全無積極意義嘅。依家大家都話，時下嘅歌手出路愈來愈窄，收入愈來愈少，淨係靠出唱片實聽乞米。依家啱啦，兩位仁兄可以開多條求生手藝，就係做武打明星。再唔係，可以在「唱作歌手」之外，殺出一條「動作歌手」嘅血路，下一張唱片推出時可以學公仔書送兵器咁，加送模型路牌一個，包賺！