世博開幕

世博今日正式開幕，呢場維時半年既大龍鳳會唔會成功，而家都係言之尚早，但係一係波就有單好笑嘢。話說江蘇一個貧困縣斥資上千萬，打造咗一個山寨版中國館，但係有人話中國館本身都係山寨人哋日本嘢，咁如果要告侵權既話，應該係世博主辦單位提出呀，抑或係日本方面提出呢可？

歡迎發表意見，2/5 刊於《太陽報》「任意網為」欄目內(截稿時間為1/5 5:00pm)

電腦抑鬱症候群

有外國研究發現，電腦壞機呀、 開機時間慢等技術故障，可以令人患上一種叫做「電腦抑鬱症候群」既症狀……講到咁複雜，同講話令人好「忟」，到底有咩分別呢？
歡迎發表意見，1/5 刊於《太陽報》「任意網為」欄目內(截稿時間為30/4 5:00pm)

櫃員機黨

早前有櫃員機多數客戶25蚊「國際交易費」，家陣又話有櫃員機黨，直頭偷取埋客戶既提款卡密碼，銀行又唔保障客戶，金管局又闊佬懶理，睇嚟市民都係轉番最傳統既方法，去銀行打簿，又或者用番月餅罐實際啲咯……
歡迎發表意見，30/4 刊於《太陽報》「任意網為」欄目內(截稿時間為29/4 5:00pm)

教師自殺

有女教師上堂途中突然跳樓自殺，真係令人遺憾。為人師表，點解都咁睇唔開呢？又點教學生要有抗逆力呀？

歡迎發表意見，28/4 刊於《太陽報》「任意網為」欄目內(截稿時間為27/4 5:00pm)

上網自我形象低?

有團體展開少女魁力素質調查，發現少女普遍對自己既體態同外表評分甚低。呢個唔出奇呀，女仔梗係貪靚。有趣既係，調查又話女生上網時間愈長，自我形象會愈低喎。兩者到底有咩因果關係呢？真係搲爆頭都搞唔明喎……
歡迎發表意見，27/4 刊於《太陽報》「任意網為」欄目內(截稿時間為26/4 5:00pm)

末代會考生

今屆最後一屆會考，末代會考生前路茫茫，確係值得關注，點知考評局到最後都唔肯放過佢哋。有應考聆聽既學生投訴，紅外線耳筒接收不清。喂，呢個問題好似講咗好多次，點解仲係冇改善？
不過另一個投訴就有啲無厘頭。有人竟然投訴試卷內容太深，似高考程度喎﹗吓，咁都得？
歡迎發表意見，26/4 刊於《太陽報》「任意網為」欄目內(截稿時間為25/4 5:00pm)

Ruby教英文

中學生Ruby教大家英文既正確發音，並且踩盡身邊所有人既英文，相信如果睇過呢條片既網友，都知豪伯講緊乜，唔知既話，可以立即click入下列呢條link睇一睇…
http://www.youtube.com/watch?v=KQ69QJ5oS5I
嘿，邊個話香港學生既語文水準日漸低落架﹗
歡迎發表意見，25/4 刊於《太陽報》「任意網為」欄目內(截稿時間為24/4 5:00pm)

要求盡快成立動物警察

facebook發現有一個叫做「要求盡快成立動物警察」既群組，起初以為邊種動物咁威，可以幫手維護法紀，睇真啲，原來係呼籲成立一個網上平台，收集全香港的虐殺動物黑點，及案件詳情，讓警方了解成立動物警察的迫切性。
呢個建議幾好呀，群策群力，起碼對嗰啲虐待動物既變態之徒應該有少少阻嚇作用﹗
歡迎發表意見，24/4 刊於《太陽報》「任意網為」欄目內(截稿時間為23/4 5:00pm)

中樂團被指浪費公帑

審計署最新報告，批評香港中樂團管理混亂，部份樂師實際工作時數比規定要求少四成，咁都唔止，報告亦話佢哋表演送飛冇監冇管，行政人員出訪時亦會選坐商務客位，住酒店就高於規定既規格……咦，乜咁熟口熟面，咁似平機會既？
歡迎發表意見，23/4 刊於《太陽報》「任意網為」欄目內(截稿時間為22/4 5:00pm)

Touch芒Touch出醜

唐唐去上海參觀世博香港館，梗係要做吓show。佢參觀香港館，嘗試使用互動裝置，點知撳其中一個輕觸式屏幕裝置既時候，竟然要等幾秒鐘至有反應，認真瘀皮﹗
歡迎發表意見，21/4 刊於《太陽報》「任意網為」欄目內(截稿時間為20/4 5:00pm)

港式咖啡王

港式咖啡王大賽，結果由嚟自深圳既參賽者勝出，第二、三名就由便利店既阿姐奪得。豪伯覺得咁樣係好事。第一，證明香港茶餐廳文化已經衝出香港，影響埋內地；第二，絲襪奶茶既一手絕活，已經深入民心，成為家傳戶曉既「港技」。
特區政府收到未呀？仲唔快啲做嘢，將港式茶餐廳申請為非物質文化遺產﹗
歡迎發表意見，20/4 刊於《太陽報》「任意網為」欄目內(截稿時間為19/4 5:00pm)

冰島火山大爆發

冰島火山爆發愈嚟愈勁，估計癱瘓歐洲至全球各地航空，影響將長達半年之久。大自然威力無窮，睇怕恐怖分子發動恐襲，都無可能令航空交通停超過三日啦……

歡迎發表意見，19/4 刊於《太陽報》「任意網為」欄目內(截稿時間為18/4 5:00pm)

蒼井空掀翻牆熱

內地對網絡嚴格管制，好多網上唔到，要上就要避過官方監察，即係「翻牆」至得。但係最近內地網民掀起一股翻牆熱，但就唔係因為要睇官方認為敏感既資訊，而係要成為日本AV蒼井空微博既支持者，你話奇唔奇？
歡迎發表意見，18/4 刊於《太陽報》「任意網為」欄目內(截稿時間為17/4 5:00pm)

停車熄匙

吹水吹咗咁耐，當局終於宣布即將提交停車熄匙立法草案。睇吓個內容，竟然係乜野新嘢都冇，都係話小巴排隊頭五架可以豁免，所有車輛都可以每個鐘豁免三分鐘唔使熄匙。唉，大家一早都提醒政府啦，咁搞法一定大把爭拗，淨係三分鐘點計法都審死官。香港社會已經唔和諧啦，仲要惹民憤添煩添亂，呢個政府到底諗乜架？
歡迎發表意見，17/4 刊於《太陽報》「任意網為」欄目內(截稿時間為16/4 5:00pm)

亞視鹹魚翻生？

呢個亞視認真巴閉，啱啱至話有倒閉危機，轉個頭佢哋高層又話可以喺兩年內收支平衡，叫大家信邊個好呀？
歡迎發表意見，16/4 刊於《太陽報》「任意網為」欄目內(截稿時間為15/4 5:00pm)

南早蝦碌

《南華早報》出現極大既蝦碌。佢哋喺頭版出咗胡錦濤既相，但係圖片說明竟然寫成異見人士胡佳。嘩，你話寫錯成胡兵或者胡軍就話啫，咁寫錯法，未免敏感啲啩……
歡迎發表意見，15/4 刊於《太陽報》「任意網為」欄目內(截稿時間為14/4 5:00pm)

嫁個富二代

有調查發現，近六成廣州女大學生願意嫁畀「富二代」，原因係可以少奮鬥好多年喎……只能夠講，呢個世界好現實，「有情飲水飽」從年來都係一個神話囉……
不過咁，淨低哥四成又係咩諗法呢？莫非已經成功釣到金龜婿？
歡迎發表意見，14/4 刊於《太陽報》「任意網為」欄目內(截稿時間為13/4 5:00pm)

英泥虐貓

人類既創意係無限，可惜好多時用發揮咗喺錯誤既方面。好似天拿水咁，原本可以用嚟清潔，又可以開油，好使好用，點知有啲人竟然用嚟索。同樣道理，英泥係一種好常用既建築材料，點知有個別賤人，將佢嚟當虐待貓咪既工具，竟然將幾隻小花貓掟落英泥缸裡頭，簡直令人髮指呀﹗
歡迎發表意見，13/4 刊於《太陽報》「任意網為」欄目內(截稿時間為12/4 5:00pm)

滾水淥B

醫療失誤又有新猷，原來喺醫院沖涼都可能出事。瑪嘉烈醫院一名護士懷疑為一個三個月大男嬰沖涼既時候，冇試清水溫就將BB放落水，結果搞到男嬰下體同臀部二級燒傷。嘩，咁細個就成為公立醫院受害者，都咪話唔驚﹗
歡迎發表意見，12/4 刊於《太陽報》「任意網為」欄目內(截稿時間為11/4 5:00pm)

香港暴動？

有大學民調話香港已經唔係和諧社會，民怨瀕臨爆煲，更嚴重既係，有成四成一受訪者接受激進抗爭行為，當中有老有少，推斷全港大約有百五萬人有咁諗。嘩，咁搞法，香港會唔會暴動架？

歡迎發表意見，11/4 刊於《太陽報》「任意網為」欄目內(截稿時間為10/4 5:00pm)

聯航工潮

唔知點解，呢排啲航空公司好似約埋咁，一齊搞工業行動，國泰工潮啱啱落幕，聯航員工又爆工潮。不過聯航員工確係值得同情，佢哋啲航班經常出狀況，空服員買驚風散都要錢啦﹗

歡迎發表意見，10/4 刊於《太陽報》「任意網為」欄目內(截稿時間為9/4 5:00pm)

I Pad炒風

雖然有讚有彈，但係I Pad推出之後，已經出現炒風，好似話要成差唔多七千蚊。內地方面據聞個價去到八、九千蚊添﹗唔知大家覺得值唔值嘞﹗
歡迎發表意見，9/4 刊於《太陽報》「任意網為」欄目內(截稿時間為8/4 5:00pm)

礦難何其多

嗰頭山西王家嶺礦難救出生還者，嗰頭美國又發生嚴重礦難，最少25人死亡。如果冇記錯既話，中國礦產量佔全世界三成，但係礦難死亡人數就佔咗八成……唉…就算改變唔到安全，係咪起碼救援經驗豐富啲，技術應該係全球第一呢？
歡迎發表意見，8/4 刊於《太陽報》「任意網為」欄目內(截稿時間為7/4 5:00pm)

可樂殺精

丹麥大學研究終於證實咗一項都市傳聞，就係可樂真係可以殺精，各位網友，你哋信唔信邪呀？
歡迎發表意見，6/4 刊於《太陽報》「任意網為」欄目內(截稿時間為5/4 5:00pm)

國泰空服員或罷工

國泰空中服務員工會向資方發出「最後通牒」，揚言下周可能會展開工業行動。亦即係話，喺外地旅遊要返香港返工既朋友，就可能比較麻煩嘞，可能要左轉右轉至返到嚟，希望國泰勞資雙方可以快啲拆掂佢，唔好搞到啲乘客啦﹗
歡迎發表意見，5/4 刊於《太陽報》「任意網為」欄目內(截稿時間為4/4 5:00pm)

消防員降體能要求

消防處表示，由於過去3年投考消防員既考生體能測試合格率唔夠四成由今個月起降低投考門檻，放寬四項入職體能要求，包括以往最難的「負載下蹲」測試，即背負和自己體重相同的物件再蹲下的項目，改為立定跳高，而原有既一分鐘仰臥起坐要 求次數將會提升。
各位網友聽完之後會唔會考慮投身烈火雄心既行列呢？抑或擔心會影響消防員既服務質素？
歡迎發表意見，4/4 刊於《太陽報》「任意網為」欄目內(截稿時間為3/4 5:00pm)

逃學威龍續集

警察又憑「逃學威龍」建奇功，今次係喺屯門多間中學，拘捕咗幾十個學生，聽聞最細嗰個得十三歲，有個毒品拆家得十五歲添咋﹗嘩，咁都得，又話而家青少年係失業重災區？睇怕可能統計漏呢批人咋卦？
歡迎發表意見，3/4 刊於《太陽報》「任意網為」欄目內(截稿時間為2/4 5:00pm)