煲呔民望插水

創意工業催化者
煲呔曾民望低處未算低，港大民意研究計劃顯示佢只得四十八點四分嘅「不合格」新低。負責調查嘅學者講到明，煲呔曾攞呢個分已經可以被列作「不受歡迎」人物，如果低到得四十五分，就直頭有「信任危機」添！
咁香港人就慘啦，煲呔曾講到明民望於佢如浮雲，咁即係話如果佢賴死唔走，市民可能仲有兩年幾要捱！
不過，香港人都唔使太悲觀，依家港府力推創意工業成為六大優勢產業之一，計我話，煲呔曾都可以為唔少創意產品提供靈感。嗱！好似話政治諷刺漫畫咁吖，老董舊時坊間都出咗唔少㗎；其他包括《笑話大全》、出氣公仔等創意產品，趁呢個倒曾潮嘅時勢推出，肯定熱賣呀！