非法賭波有冇得冚？

世界盃就快開鑼，警方尋日高調召開記者會，強調會加強打擊網上非法賭波。大家諗吓嗰陣時一單淫照事件，已經暴露出警方網上執法既能力。大家對警方呢輪打網上非法賭波，又有冇信心呢？
歡迎發表意見，2/6 刊於《太陽報》「任意網為」欄目內(截稿時間為1/6 5:00pm)

潮語新用

大家唔好以為「潮語」淨係可以扮in，同埋可以應該公開考試，原來仲可以幫助撲滅罪行。海關最近搗破一個販賣盜版光碟既網站，就係靠派出臥底同目標人物扮熟，方法係經常講「潮語」，等對方以為佢係「無知少女」同埋「電車男」，咁先可以拉到人……
歡迎發表意見，1/6 刊於《太陽報》「任意網為」欄目內(截稿時間為31/5 5:00pm)

起錨

煲呔曾同成班高官出街宣傳政改，仲高叫「起錨」口號，寓意政制向前走添﹗嘩，佢唔係咁高估自己受歡迎程度呀？小心一陣起錨變「拋錨」呀﹗

歡迎發表意見，31/5 刊於《太陽報》「任意網為」欄目內(截稿時間為30/5 5:00pm)

明報真好玩

明報真係「好睇」，喺度講個秘密過網友們聽。豪伯平時都鍾意睇吓呢個嘢。唔係因為佢係咩「公信第一」，而係追開佢「更正與澄清」欄目。好似最近咁呀，佢哋竟然將「雷米金盃」同「大力神盃」撈亂咗，真真有趣。
歡迎發表意見，30/5 刊於《太陽報》「任意網為」欄目內(截稿時間為29/5 5:00pm)

撞胸阿叔橫行

本報智破觀塘「撞胸阿叔」，協助警方拉人，可以話係社區除一害，大快人心。原本以為觀塘區婦女可以鬆一口氣啦，點知有懷疑有人唔知衰，竟然跟住嚟做，結果被拉上差館添﹗

歡迎發表意見，29/5 刊於《太陽報》「任意網為」欄目內(截稿時間為28/5 5:00pm)

變態盆景貓

「盆景貓」，即係將隻貓放入一個樽內，齋聽已經覺得變態，點知原來真係有人buy。某名人喺外國留學個女，喺微博自爆訂購咗「盆景貓」，仲話聽日有貨添，件事傳咗出嚟即係引發眾怒，唉，早知如此，何必當初呢？

歡迎發表意見，28/5 刊於《太陽報》「任意網為」欄目內(截稿時間為27/5 5:00pm)

暴力校園

有大學同社福機構進行研究，了解本港校園暴力情況，結果竟現發現有七成受訪者被暴力欺凌，一半學生更加因為咁樣唔敢返學；調查又發現男生比女生更易受性騷擾，問題似乎都幾嚴重喎……
歡迎發表意見，26/5 刊於《太陽報》「任意網為」欄目內(截稿時間為25/5 5:00pm)

後生仔不識食鬼

唔經唔覺，經典電玩「食鬼」啱啱過咗三十歲生日，Google為咗慶祝，將個logo化身為「食鬼」遊戲，仲畀用家即時玩添，點知竟然接到投訴喎。豪伯開頭以為梗係啲人投訴話掛住玩嘥哂啲時間啦，原來多數都係話唔知個logo變到花呢碌代表乜嘢，仲以為自己部腦中毒添。乜三十年前既遊戲真係out哂？
歡迎發表意見，25/5 刊於《太陽報》「任意網為」欄目內(截稿時間為24/5 5:00pm)

頭文字D

終於喺youtube睇咗哥段題為《fd2~~大欖隧道》既短片。嘩﹗架私家車時速超過240公里？係真唔係呀？我見佢過其他車都唔係好快咋喎，除非喺佢前面啲車都有180km/h啦﹗

歡迎發表意見，24/5 刊於《太陽報》「任意網為」欄目內(截稿時間為23/5 5:00pm)

女教師一定要著裙？

有教師去平機會投訴，話校方規定女教師要著裙唔公平。有啲老師尋日打上電台，話學校冇電梯，著裙上落好唔方便，但係校方一定要佢著，你哋又點解呢？
有啲好奇，如果有學校規定唔畀男教師著裙，係咪又公平番呢？
歡迎發表意見，23/5 刊於《太陽報》「任意網為」欄目內(截稿時間為24/5 5:00pm)

港鐵加價

港鐵唔理反對聲音，堅持如期喺下個月十三號起加價百分之二點零五，而政府啱啱公布既收據亦都顯示，本港通脹率有上升跡象，睇嚟小市民都係有排捱咯……
歡迎發表意見，22/5 刊於《太陽報》「任意網為」欄目內(截稿時間為21/5 5:00pm)

港府唔識Mycar係寶

港產電動車Mycar揚威國際，不但打入美國市場，仲獲丹麥環保旅遊島引入。好笑既係，港府之前一直對Mycar冇乜興趣，點知邱騰華尋日即刻撲出嚟，話港府有興趣訂購，可惜你急人地唔急，而家人哋主要市場喺歐美，唔再吼香港市場囉……
歡迎發表意見，20/5 刊於《太陽報》「任意網為」欄目內(截稿時間為19/5 5:00pm)

害人孖仔燈

沙田大涌橋路發生奪命車禍，成架小巴飛埋落隧道，聽聞係可能有人睇錯燈累事，據聞係有司機睇錯「孖仔燈」而出事。所謂「孖仔燈」，即係同時附有直去及左/右轉燈號既交通燈，司機唔熟路隨時睇錯。大埔今年三月都曾經發生過類似交通意外，政府又唔係冇錢，點解唔將全港「孖仔燈」轉為獨立燈號呢？

歡迎發表意見，19/5 刊於《太陽報》「任意網為」欄目內(截稿時間為18/5 5:00pm)

消防養狗階級化

唔講唔知，消防員宿舍原來係唔畀養狗既，不過就只限散仔，長官就不在此限。吖，唔知消防員被發現養狗的話，會唔會好似公屋咁要實行扣分制，扣滿分要畀人peng走呢？
歡迎發表意見，18/5 刊於《太陽報》「任意網為」欄目內(截稿時間為17/5 5:00pm)

Google收集私隱

Google搞既立體地圖確係幾過癮，但係原來佢哋既街景拍攝車過去幾年喺全球各地拍攝期間，意外經wifi收集咗未經加密既個人資料，Google方面已經承認出錯同埋道歉，並且應承盡快刪除所有數據。
歡迎發表意見，17/5 刊於《太陽報》「任意網為」欄目內(截稿時間為16/5 5:00pm)

坐到屁股開花

話人踎監踎到屁股開花就聽得多，原來坐電腦凳都可以坐到爆炸，炸傷人個屁股，你話係咪得人驚呀？
歡迎發表意見，16/5 刊於《太陽報》「任意網為」欄目內(截稿時間為15/5 5:00pm)

風水鬥法

兩大風水師反目，呢單嘢其實好有趣。其實計我豪伯話齋，要驗證一個風水師準唔準，與其由個官判，不如科學化啲，叫佢哋預測一下一個月之後既恆指，以最貼近實際水平嗰個為勝方咪得囉……
歡迎發表意見，14/5 刊於《太陽報》「任意網為」欄目內(截稿時間為13/5 5:00pm)

Twitter大整蠱

Twiter被踢爆有bugs，可以令到任何人都成為你既追隨者。聽落又好似幾過癮咁喎，如果你有玩開，又希望邊個成為你既追隨者呢？
歡迎發表意見，14/5 刊於《太陽報》「任意網為」欄目內(截稿時間為13/5 5:00pm)

港生中文包尾

本港學生語文能力屢被批評每下愈況，有語言學者去年比較香港、上海及廣西三地大學生的中國語文能力，結果本地大學生包尾。咦，之前香港學生英文水平都畀人話低架啦，咁咪即係中又唔掂、英又唔得？
歡迎發表意見，12/5 刊於《太陽報》「任意網為」欄目內(截稿時間為11/5 5:00pm)

特首老婆寵家臣

煲呔曾用人唯親就係人都知，有傳佢夫人寵愛一名禮賓府助理文書主任，任期超過六年唔調職，預料做到曾蔭權任滿至走人。
唉，其實呢個問題好易拆啫，只要煲呔乾脆將呢個職位轉為問責官員，好似副局政助咁政治委任咪得囉﹗
歡迎發表意見，11/5 刊於《太陽報》「任意網為」欄目內(截稿時間為10/5 5:00pm)

污染大國崛起

仲記唔記得前排內地既沙塵暴飛到周圍係，連日本都瀨嘢呀？澳洲一項「全球十大污染最嚴重國家名單」調查，中國榜上有名，而且仲係三甲之一添﹗

歡迎發表意見，10/5 刊於《太陽報》「任意網為」欄目內(截稿時間為9/5 5:00pm)

假波風暴

本地足球假波風暴愈演愈烈，再有多名球員牽涉在內。豪伯反而搞唔明一樣嘢，香港足球有幾多人睇呀，值得咁大費周章、冒咁大風險去賄賂球員咩？要賭，大家賭吓牙較，打吓手掌咪算數囉﹗
歡迎發表意見，9/5 刊於《太陽報》「任意網為」欄目內(截稿時間為8/5 5:00pm)

港生報考牛津有優勢？

牛津大學新任校長Hamilton表示，本港學生如果喺中學文憑試考獲5級或5*級成績，喺報考牛津大學時會有很大競爭力。不過佢提醒學生，除咗良好英語能力外，具創意及批判思想亦很重要。
嘩，連牛津大學校長都讚香港學生醒，睇嚟港府真係要借機大事宣傳一番喎﹗
歡迎發表意見，8/5 刊於《太陽報》「任意網為」欄目內(截稿時間為7/5 5:00pm)

警方手銬合法化

警方之前強調用手銬，只係適用於被捕人士，點知最近又改口，話喺兩種情況，即係懷疑有人精神紊亂，同埋履行警隊職責維持公安同防止有生命同財產受損時，都可以用手銬……咁搞法，容乜易濫權架？

7/5 刊於《太陽報》「任意網為」欄目內(截稿時間為6/5 5:00pm)

稅局局長自己名都讀錯

稅局局長朱鑫源話自己名裡面個「鑫」應該讀「蔭」，仲笑笑口咁話呢個字有好多讀音，好多人都會讀錯。點知記者問番語言學者，至知原來個「鑫」字原來得一個讀音，就係讀「陰」字，即係話，讀錯既唔係別人，正正係朱局長自己喎﹗你哋話係咪笑爆嘴呢？
歡迎發表意見，6/5 刊於《太陽報》「任意網為」欄目內(截稿時間為5/5 5:00pm)

性奴遺書

「起來，饑寒交迫的奴隸」……勞動節啱啱過，唔好以為香港雖然冇澳門咁激，原來都有人響應《國際歌》呢句歌詞……之唔係不滿自己畀女友當性奴憤而寫遺書，惹來自殺疑雲嗰個哥仔囉﹗
歡迎發表意見，5/5 刊於《太陽報》「任意網為」欄目內(截稿時間為4/5 5:00pm)

蝸居一族

本港樓價瘋漲，好多人打十年工，都買唔起樓，要買都好可能要屋企人幫。至於班岩岩出嚟做嘢既後生仔自然更慘。佢哋有幾憤怒？大家可以從尋日既《城市論壇》節目裡面，佢哋有幾咁激進，可見一斑嘞……

歡迎發表意見，4/5 刊於《太陽報》「任意網為」欄目內(截稿時間為3/5 5:00pm)

代客綁鞋帶

大家冇睇錯，內地的確興起呢個服務。原來而家啲o靚仔好多都係獨生子女，自理能力好差，結果有啲連綁鞋帶都唔識。呀，唔知代客扣鈕又有冇得做呢可？
歡迎發表意見，3/5 刊於《太陽報》「任意網為」欄目內(截稿時間為2/5 5:00pm)