政府龕位死都未輪到
做香港人真係悲哀，在生時搵唔到錢，要做冇殼蝸牛，好嘞，死咗嘞，以為可以抖吓啦，點知原來「陰宅」一樣咁搶手，早排有團體推售一千個靈灰龕位，墟冚囉，即刻引來排隊搶購熱潮。原來排政府龕位竟然分分鐘要成六年咁耐，真係唔爭崩頭就有鬼咯。就算我今日開始排，都唔可以確保我有生之年真係排到個龕位喎……
你知啦，一個人冇地方落腳，自不然要四圍騰打發時間㗎嘛，第時我喺下面要請願搵個對口單位，咁我應該搵下面嘅「房屋局」呀，抑或搵陽間嘅食環署呢？真係愈諗愈驚。下面通貨膨脹咁厲害，郁吓使錢都幾千萬幾千萬上落，卓署長麻煩做吓好心，等我第時有個安樂窩呀！
skip to main |
skip to sidebar
其實d龕位都唔平，要幾萬元一個，雖然有d擺明係排隊黨，但係見到d阿婆排咁耐隊都買唔到位，真係好陰公，死去的親人見到都唔安樂啦，政府又唔做野，得咁少龕位提供，比機會d私營龕位不斷坐地起價！！
回覆刪除唔講得笑,入定幾間喺手,有得炒呀.
回覆刪除係嘞，順祝你哋個blog好似啲陰宅咁受歡迎,哈哈!!
有冇搞錯﹖老人院舍分分鐘排到死都冇得入住，原來連骨灰龕位又話要排，咁做人仲有咩意思呀﹖
回覆刪除「陰宅」豆腐膶咁細都賣成萬萬聲，咪仲貴過啲豪宅﹖小市民點負擔得起呀﹖
回覆刪除