圍威畏開放日

不知悔改怒刮內鬼
水警醜聞浪接浪，繼開「海鮮美酒工作會議」後，又被踢爆將「開放日」變做「家屬同樂日」，明明可以藉機向市民介紹水警工作，點知咁都要益自己友，只有新舊同袍同佢哋嘅子弟至有幸登船參觀，有冇搞錯？
不過唔好話豪伯唔提醒有幸上船參觀嘅朋友，千祈唔好以為過癮呀，隨時出事㗎嘛！呢嗱，自從警官歎海鮮事件曝光後，有關人等第一個反應唔係檢討吓自己，而係諗：明明好低調㗎啦，點解都畀人踢爆呢？擺明係自己人告密啦！聽講家陣水警內部一片「白色恐怖」，個個都擔心自己被牽連。日後再有咩負面新聞，你哋上過水警輪參觀，分分鐘可能成為被懷疑對象！