慳電膽現金券有幾環保﹖

呢頭慳電嗰頭嘥紙
煲呔曾成份施政報告最實牙實齒嘅，竟然係嗰一百蚊慳電膽現金券，吹脹！
最好笑嘅係，雖然慳電膽節省電力，但電力公司可能根據利潤管制協議加電費；二來竟然用紙印現金券出嚟。大佬呀！長者醫療券都電腦化啦，你仲喺度濫伐樹木，咁唔環保㗎！
不過依家環唔環保都冇所謂啦，大家一早已經將焦點放晒喺疑似利益輸送事件上面，如果我係煲呔曾嘅話，一定會將計就計，咁樣同市民交代：「呢件事話畀大家聽，其實環保同商業並冇矛盾，一樣可以大把商機！」跟手乘勢喺本港大學開設更多同環保有關嘅學位課程，咁到時咪可以一次過惠及教育同環保呢兩個「優勢產業」囉！