拜拜熱狗巴士

少個選擇焗人搭貴車
巴士公司決定淘汰「熱狗巴士」，被人批評話係變相加車費逼人搭貴車。咁又難怪嘅，大家不妨留意吓啲巴士站吖，大把公公婆婆寧願等耐啲，都要坐架平啲嘅「熱狗巴士」。
或者巴士公司會咁講啦：我哋都係為大家好，天時暑熱畀架涼啲嘅車你哋坐，等你哋舒服啲唔好咩？但係細心諗吓又有問題喎，茶餐廳凍飲收貴啲，等人可以消吓暑舒服啲，但係都唔會話取消晒所有熱飲啩？仲有呀，有啲所謂「空調巴士」，根本同蒸籠冇乜分別，我夠坐得唔舒服啦，又唔見可以退番部分車費。
其實講到尾，作為消費者都係想多個選擇啫，都唔算太過分啫吓話？