青少年公德淪亡

清潔工作長做長有
中秋節過後全港郊野公園慘變垃圾崗，有清潔工人反映，好心叫啲o靚仔將垃圾包好，點知被人窒番轉頭，話「我哋唔將垃圾掟落地，你哋邊度有工開」！嘩，呢班後生仔都算陰毒囉，依家經濟不景，咒人哋冇工開，幾乎衰過殺人全家呀！
但計我話，就算「米飯班主論」成立都冇用。大家有冇留意一段新聞，話有個債仔被收數佬上門追數，一怒之下揮刀怒斬之，結果兩敗俱傷一齊送院治理。嗰個債仔當初係咪應該同追數佬講：「我哋全部自動自覺準時還款，你哋邊度有工開？」
不過，清潔工人可以定，因為年年中秋都有呢班「垃圾青年」出嚟搞搞震，你哋份工實長做長有！