成功爭取失業率微跌

勞工之友唔照失業人口
勞福局局長張建宗興高采烈咁出嚟話畀大家聽，本港就業市場已經趨向穩定，但係原來失業率只係微跌咗百分之零點一咁大把咋！
張局長對於咁小成績就沾沾自喜，香港人都咪話唔驚。豪伯曾經睇過某位區議員掛嘅街板，上面大大隻字寫住「成功爭取此綠公仔燈延長兩秒」，嘩！真係豐功偉績，街坊真係多得你唔少囉！老實講，大家覺唔覺張局長「成功爭取失業率下降零點一個百分點」，同「綠公仔燈」街板好相似呢？
喂！咪住，乜張局長唔係「勞工之友」咩？點解唔幫吓啲失業人士早日搵到工？可能失業人士唔算係「勞工」，所以唔喺局長朋友之列啩……