東亞運外勞

女民兵揸旗再救票房
提起外勞，大家可能頭都暈一暈。你諗吓呀，之前攞行街紙嘅人士都可以做嘢，已經引起好大關注，搞到政府都要急急修例，莫講話直頭輸入外勞咯。
不過唔使驚，原來只係東亞運開幕禮，請咗兩個內地女民兵嚟做開幕禮嘅旗手。有啲人會大驚小怪，話東亞運明明係香港人嘅「傳奇一刻」，點解又由內地人擔任旗手呢？
咁講就唔啱數啦。成個東亞運明明水靜河飛，吉祥物又嚇到啲細路嗌阿媽救命，都係多得有劉翔、郭晶晶、林丹等內地體壇明星過嚟撐場，你個票房至唔會太難睇咋，家陣再幫你，搵兩個女民兵嚟幫你哋揸旗，唔該你哋飲水思源啦！