超豪校園

「德政」值得大力鼓吹
東亞運就嚟開幕，到依家都甩甩漏漏，連電腦都唔夠用，可能係使得太少錢啩！睇吓人哋職訓局喺調景嶺起嘅兩幢新校舍啦，使咗成十二億㗎，夠搞三次東亞運有突。唔好咁獨食好喎，一於開放畀遊客參觀啦！
十二億起間學校，大家都話唔抵，之但係相比起其他公營機構洗腳唔抹腳嚟講，都勉強可以講有一個「好處」，就係普通人家嘅子弟都有機會入讀，而鄧爾邦坐商務客位環遊世界「公幹」、入住大使級酒店套房，我哋唔會有份享受喎！
所以呢，起超豪校園呢項「德政」絕對值得大力鼓吹，最好十八區都起「超豪泳池」、「超豪體育館」，等小市民都沾吓光歎番吓嘛！