考評局考起考生

高級程度會考聆聽試問題多多，繼部分改用紅外線系統的聆聽試場爆出播放中斷後，使用傳統電台廣播系統的部分試場亦同樣嚴重接收不清。今次班考生真係畀考評局玩死﹗

歡迎發表意見，2/4 刊於《太陽報》「任意網為」欄目內(截稿時間為1/4 5:00pm)

醫者公母心？

公立醫院事故多多，唔係輸錯血、割錯乳，就係將病人身體當儲物櫃。原來私家醫院都唔係好好多。有孕婦喺私家醫院生仔，醫院開頭勸佢佢刮宮刮走個BB，好彩準媽媽冇聽到咋，而家個小朋友三歲幾，你話咁做醫生法，病人真係多得佢唔少啦﹗
歡迎發表意見，1/4 刊於《太陽報》「任意網為」欄目內(截稿時間為31/3 5:00pm)

高鐵多災多難

廣深港高鐵既廣深段將會喺今年十月廿八號通車，到時每程只需25分鐘。到時就只係剩番香港嗰橛未搞掂。唉，人哋內地基建就劍及履及如火如荼，反觀香港就好事多磨，大家話啦，香港段高鐵要搞到幾耐先通到車呢？
歡迎發表意見，31/3 刊於《太陽報》「任意網為」欄目內(截稿時間為30/3 5:00pm)

放天燈似放紙鳶

梅窩搞天燈節，本來幾有本土特色，據聞都吸引好多內地同外國遊客，可惜安排就混亂咗少少，有人反映話排幾粒鐘先至有得放，就算有耐性輪到，先發現原來唔可以將燈放上天飄走，要好似放風箏咁有繩連住……似乎有啲美中不足喎……
歡迎發表意見，30/3 刊於《太陽報》「任意網為」欄目內(截稿時間為29/3 5:00pm)

天價飛龍

之前香港個飛龍標誌成隻甩毛雞咁，畀人鬧到七彩，結果當局一度將佢摺埋，點知而家又話使多百幾萬「改良」個logo，點改法？原來只係加三劃嘢咁大把。喂，係咪玩嘢先？
歡迎發表意見，29/3 刊於《太陽報》「任意網為」欄目內(截稿時間為28/3 5:00pm)

成藥冇王管

又有中成藥出事，今次嗰隻係大家經常會服食既老字號品牌，仲check到有致癌藥添。成藥出事唔係咩新聞，之前都唔知發生過幾多次類似事件，但衰就衰在，今次據講出事藥廠一月就發現有問題，但係就冚埋冚埋，唔報畀衛生署知，直到新加坡話回收嘞，衛生署知識跟進，後知後覺到呢……

歡迎發表意見，28/3 刊於《太陽報》「任意網為」欄目內(截稿時間為27/3 5:00pm)

港鐵加價

港鐵宣布按票價可加可減機制，將於6月加票價，整體加幅2.05%。港鐵表示，在完成所須行政程序後，會發出正式通知，公布加價詳情。
喂，唔係卦，又話可加可價機制，幾時實牙實齒減過價呀？
歡迎發表意見，27/3 刊於《太陽報》「任意網為」欄目內(截稿時間為26/3 5:00pm)

酒樓部長也有假

而家呢個世界真係傻咗，連酒樓部長都有人假扮，從而攞咗顧客既信用卡或者現金，睇怕以後都係唔好亂咁爭住請客畀錢囉……
歡迎發表意見，26/3 刊於《太陽報》「任意網為」欄目內(截稿時間為25/3 5:00pm)

谷歌出招

谷歌喺中國話走又唔走，而家終於出招嘞，佢哋啱啱宣布停止審查Google.cn，又將個網直接連結去Google.com.hk，話歡迎來到谷歌喺中國既新家喎……睇嚟今次google係堅個喎﹗
歡迎發表意見，25/3 刊於《太陽報》「任意網為」欄目內(截稿時間為24/3 5:00pm)

香港沙塵暴

真係恐怖呀，香港都出現史上第一次沙塵暴，漫天風沙咁，空氣污染指數仲高到差唔多500添。真係唔明，點解天文台同環保署好似完全冇預警咁既？
歡迎發表意見，24/3 刊於《太陽報》「任意網為」欄目內(截稿時間為23/3 5:00pm)

露宿新趨勢

有社工組織調查發現，本港露宿者有三大趨勢，包括回流港人、在職貧窮同再露宿。嘩，有嘢做都要瞓街，咁仲點解咁辛苦打份牛工呢？
歡迎發表意見，23/3 刊於《太陽報》「任意網為」欄目內(截稿時間為22/3 5:00pm)

奀豬胎暗結

警犬「奀豬」早排離家出走，而家成件事終於真相大白嘞﹗原來佢出走時已經珠胎暗結，當時係出去尋找一個天然窩巢，用嚟保護即將出生既仔女。
唉，估唔到香港地唔單止人類難搵上樓，搞到通街無殼蝸牛，原來呢狗搵竇口都咁頭痕……
歡迎發表意見，22/3 刊於《太陽報》「任意網為」欄目內(截稿時間為21/3 5:00pm)

非主流九十後

內地網絡最近流傳一段名為「九十後非主流賣身求榮」既短片，有個自稱今年十六歲既小妹妹，竟然話身邊朋友個個都破咗處，擔心自己變「老姑婆」，於是出錢請人幫佢破處，仲將整個過程放上網添。嘩﹗乜而家啲後生真係咁開放？
歡迎發表意見，21/3 刊於《太陽報》「任意網為」欄目內(截稿時間為20/3 5:00pm)

內地潲水油

內地食品工業又有新猷，今次係從渠道撈番出嚟循環再用既潲水油。雖然專家話毒性比砒霜強一百倍，但係老實講，而家內地食品樣樣都話有害，潲水油都算比較環保啦﹗
歡迎發表意見，20/3 刊於《太陽報》「任意網為」欄目內(截稿時間為19/3 5:00pm)

空姐工業行動

有航空公司既空姐不滿新編更制度，打算發起工業行動。工業行動唔奇，而家好多國家都有航空公司鬧工潮，但係據講呢間航空公司有員工透過facebook組織動員群眾。如果真係成事，又會唔會揭開工運新一頁呢？不過話時話，佢哋準備屧紅色指甲同戴口罩抗議，到底同佢哋爭取既議題有咩關係呢？
歡迎發表意見，19/3 刊於《太陽報》「任意網為」欄目內(截稿時間為18/3 5:00pm)

忽然保育

永利街又話唔使拆嘞。嘩，真係一個獎改變咁大？如果係咁樣，不如索性搵德國啲青少年(係佢哋頒獎畀《歲月神偷》既)嚟做高官啦﹗之前皇后瑪頭、天星小輪嘈到拆天，又唔見你聽吓民意？
唉，唯有希望香港政府「覺今是而昨非」啦﹗
歡迎發表意見，18/3 刊於《太陽報》「任意網為」欄目內(截稿時間為17/3 5:00pm)

食即食麵咪飲湯

消委會測試市面48款即食麵，發現大部份的鈉含量及總脂肪都偏高，可能導至高血壓及其他心臟病。其中有啲更超過每日攝取量標準一半。消委會建議市民，小心選擇即食麵，要留意營養標簽，盡量少用調味湯包同唔好飲湯。
嘩，成個即食麵既精華，就係在於個湯包同啲湯，要避開哂，咁不如索性唔好食啦﹗呢樣又話有害嗰樣又話致癌，就嚟飲水都話有毒啦﹗
歡迎發表意見，17/3 刊於《太陽報》「任意網為」欄目內(截稿時間為16/3 5:00pm)

微軟老細怒搶員工iphone

早排湖北省長李鴻忠鬧記者，仲搶埋對方支錄音筆，結果惹咗眾怒，有人要求佢道歉辭職，但其實大家可能怪錯咗佢，其實一個人嬲起上來，自然會失去理性。話說微軟舊年9月開職員大會，會上有人用iPhone為總裁保曼影相，保曼當堂火都嚟埋，一嘢搶咗個iPhone，仲放喺地下作勢要踩爛添﹗所以話啫，李省長比起上嚟，算係溫文爾雅架啦﹗
歡迎發表意見，16/3 刊於《太陽報》「任意網為」欄目內(截稿時間為15/3 5:00pm)

BBC教員工用facebook

BBC開班教員工用Facebook，聽聞兩日課程每人要使成50鎊。同埋到底有咩學要咁貴呢？又包唔包埋教啲人喺Facobook度扮自己係single呢？
歡迎發表意見，15/3 刊於《太陽報》「任意網為」欄目內(截稿時間為14/3 5:00pm)

整容潮年輕化

早前港大有個男生為咗滿面暗瘡而自殺，震驚全城。原來家陣年輕人愈嚟愈注重自己容貌，整容已經有年輕化趨勢，據講有小學五年級十歲o靚好就走去光顧整容醫生，你話係咪得人驚呀？
歡迎發表意見，14/3 刊於《太陽報》「任意網為」欄目內(截稿時間為13/3 5:00pm)

大學公務員減薪

薪常會公布政府入職薪酬調查，以後大學生打政府工，月薪至少減二千。老實講，呢吓真係典型既無良僱呀。雖然公務員始終係薪高糧準，恨得唔少人牙癢癢，但係政府咁做，心態無非係恰新入職既o靚仔，擺到明係話︰咁唔妥唔好嚟求我畀份工你囉，反正你唔做大把人做。唉，又唔見佢哋郁啲舊人﹖一句到尾，欺善怕惡啦﹗
歡迎發表意見，13/3 刊於《太陽報》「任意網為」欄目內(截稿時間為12/3 5:00pm)

超級乳豬仔團

一個有二十四名菲律賓人的港澳旅行團，昨傍晚抵達赤鱲角機場後，團員發覺無本港旅行社代理接機，一行滯留機場慘變「豬仔團」。嘿嘿，話明旅遊，最重要梗係體驗當地文化同風土人情啦，今次仲唔畀佢哋見識吓中國人呃人既利害﹗如果去埋內地旅遊，肯定仲有機會見識埋博大精深既「化學品飲食文化」添呀﹗
12/3 刊於《太陽報》「任意網為」欄目內(截稿時間為11/3 5:00pm)

太平洋垃圾島

每年年宵之後，維園都會留下大量垃圾，唔好以為呢個場面已經好觸目驚心，原來全太平洋最大既垃圾島，面積足足有成一千個香港咁大。呢個垃圾島係由人類棄置既膠袋、膠樽同鋁罐等垃圾組成，六十年累積之下就成為呢個壯觀場面，問你怕未？
11/3 刊於《太陽報》「任意網為」欄目內(截稿時間為10/3 5:00pm)

電視台風雲

亞視兩個股東互片，老實講，真係好好睇，呢單嘢睇嚟仲有排玩，大家不妨繼續留意事態發展。豪伯就只係覺得，亞視之前決定唔再自己拍劇，實在非常明智。呢套劇如果搬上電視螢幕，收視爆硬﹗
歡迎發表意見，10/3 刊於《太陽報》「任意網為」欄目內(截稿時間為9/3 5:00pm)

觀音開庫

11號星期四係觀音借庫既大日子，今年有人搞搞新意思，喺旺角行人專用區開設「分行」，等人可以就腳啲容易借到錢，又有人開始網上借庫服務……不過咁喎，咁無誠意，觀音係咪真係肯幫手架？
歡迎發表意見，9/3 刊於《太陽報》「任意網為」欄目內(截稿時間為8/3 5:00pm)

唐唐畀人掟鞋

好嘢﹗香港政治人物終於同國際接軌嘞﹗唐唐今日出席青少年論壇既時候，有後生仔向佢掟鞋抗議，只見佢氣定神閒，並無驚惶失惜，唔通唐唐已經晉身布殊既段數？不過諗諗吓，會唔會只係嗰個後生仔冇乜準繩度，距離目標太遠呢？
(歡迎發表意見，8/3 刊於《太陽報》「任意網為」欄目內(截稿時間為7/3 5:00pm)

司機都要驗毒？

大埔校園驗毒試行計劃虎頭蛇尾，當局話唔打算擴展去其他區既學校，點知家陣又話打算搞司機驗毒，唔知又會唔會好似校園驗毒計劃咁，又話侵犯私隱，又要求係自願性質呢可？
(歡迎發表意見，7/3 刊於《太陽報》「任意網為」欄目內(截稿時間為6/3 5:00pm)

內地食品安全點搞？

喺內地食嘢真係一步一驚心，而家連豆角咁平既野都話有毒，問你怕未？學者鍾南山話改革制度，指定一個部門管理食品安全，就可以根治問題喎，各位又信唔信真係work呢？
歡迎發表意見，6/3 刊於《太陽報》「任意網為」欄目內(截稿時間為5/3 5:00pm)

大學生自殺風

唔知點解，呢排發生好多大學生自殺既不幸事件。先有科大碩士生跳樓，再有港大生吊頸。唉…後生遙遙，大把前途，因乜事咁睇唔開呀？
歡迎發表意見，5/3 刊於《太陽報》「任意網為」欄目內(截稿時間為4/3 5:00pm)

馬路如虎口

虎年有好多祝賀語句，但係千祈唔好漏咗「馬路如虎口」呢一句警告字句。呢嗱，尋日一個小巴司機突然發羊吊，釀成一死五傷慘劇，仲有之前白車危駕幾乎撞死人……新正頭發生呢啲嘢，你都咪話唔邪門…
歡迎發表意見，4/3 刊於《太陽報》「任意網為」欄目內(截稿時間為3/3 5:00pm)

地獄馬拉松

一年一度既香港馬拉松啱啱結束，唔知點解今年會搞到咁大鑊，有好多跑手跑到入廠，有幾個更幾乎一命嗚呼添﹗到底係香港賽道特別艱辛，根本非常人能應付，抑或係我哋香港既體質寧捨孱弱呢？

歡迎發表意見，3/3 刊於《太陽報》「任意網為」欄目內(截稿時間為2/3 5:00pm)

警隊又爆醜聞

警隊又爆醜聞﹗繼水警歎海鮮後，灣仔警署日前又被爆以賀新春為由，大搞啤酒派對，短短時間掃光左過百支啤酒。唉……香港警察不如轉行旅遊大使，宣傳香港既好飲好食既地方仲好過。
歡迎發表意見，2/3 刊於《太陽報》「任意網為」欄目內(截稿時間為1/3 5:00pm)