金融海嘯周年祭

鬍鬚曾預測經濟鋪鋪錯
乜啲專家唔係話呢劑金融海嘯可能係上世紀三十年代大蕭條以嚟最大鑊嘅一次咩？講到經濟復甦，就更加係英文字母滿天飛，又L又U，梗係唔見個V字。咁點解短短一年後，鬍鬚曾居然可以振臂一呼，話本港經濟已經「喺隧道見到曙光」？
好彩香港人出晒名鍾意賭錢，賭仔都鍾意睇往績，就算同「往績」完全無關嘅大小、六合彩等都唔例外。好嘞，睇番鬍鬚曾以往講親經濟預測、赤字預算，以至「釘木板」可以抵抗金融海嘯等，次次都係錯，所以佢呢鋪話香港經濟露曙光，根本冇人會跟佢「下注」。簡單啲講，香港人都知聽鬍鬚曾老點，會好似師傅話齋：「出事㗎嘛！」大家一早已經睬佢都傻矣！