九霄驚魂

民航處又搵前線祭旗
民航處耗資逾千萬公帑買咗套抵港航班管理系統，點知上個月試用階段已爆出錯誤航班訊息危機，好彩空管人員發現得早立即改以人手操作，先至避過一場九霄驚魂咋。喂，人命關天㗎，點可以好似細路哥玩泥沙咁試吓試吓㗎？
早排醫管局派員去外國考察豐田車廠運作，畀人插到暈。唔知民航處係咪因為冇去外國考察至出事呢？應花嘅公帑又唔花，唔應使就使咗去，吹脹。講開又講，睇落民航處嘅辦事作風又同醫管局有幾分相似。聽講民航處管理層為咗推卸責任，對幾位空管人員施以停牌處分。又玩「刑不上大夫」，求其搵幾件前線出嚟祭旗，仲話唔係向醫管局偷師？