紀律部隊加人工

扶貧紓困就牙痛咁聲
大家果然冇估錯，政府經過一輪「考慮」後，最終都係向紀律部隊屈服，八成紀律部隊人員即時變相加薪，政府每年花喺紀律部隊嘅錢，當堂多咗七億幾！
真係講起都激氣，呢個咁嘅特衰政府，叫佢扶吓貧紓吓困，慘過畀人舂兩拳，仲威脅話如果長期推行紓困措施嘅話就要加稅。哦，依家每年大手筆使近八億改善紀律部隊嘅待遇，就眉都唔皺一下，咁算點先？
不過鬼叫你冇得佗炮，冇厘power，邊個會驚你呀？老實講，都預咗畀班紀律部隊任劏（我係指個荷包）o架喇，豪伯我只有一個卑微願望：第時政府唔好再浪費納稅人嘅錢嚟登紀律部隊招聘廣告，反正咁嘅筍工本身都已經爭崩頭啦！